Mukanda muibidi wakatumina Paulo Timote

 

Paulo wakalamata ditabuja

Nakuluangana mvita mimpe, nakujikija tshidikijilu tshia lubilu, nakulamata ditabuja ; tshidi kumpala mpindiewu ntshifula tshia butumbi tshia buakane bua Nzambi tshintekela, tshialua Mukelenge mulumbuluishi muakane kumpa dituku diadia : kena utshimpa anu meme, kadi neatshipe bonso kabidi badi basue dimueneka diende. 4:7,8

 

Nansha bantu ba bungi bakamana kupambuka bualu bua ditabuja, Paulo udi mua kuamba ne, Nakujikija lubilu luanyi, wakalumbila lubilu luende mutangile kudi Yesu. Yeye wakambila Bena Filipoi ne, Ndi ngenza bualu bumue : Pandi mpua muoyo bua malu a kunyima, pandi ndobelela ku malu adi kumpala, ndi ntshinta bua kufika ku ndekelu wa njila bua kuangata bukenji bua dibikila dia mulu dia Nzambi mu Kilisto Yesu (Filipoi 3:13,14).

Paulo wakajikija luendu lua muoyo bimpe bualu bua yeye wakenza malu ende onso mu dimanya dia «dituku diadia». Dituku dia disanka mene, pafuta Mukelenge bantu bende difutu diabo. Malu onso anudi nuenza, nuenza ne mitshima yenu bu munudi nuenzela Mukelenge ; kembu munudi nuenzela bantu ; bualu bua nudi bamanye ne, Netuangate difutu dia bupianyi kudi Mukelenge. Nudi nukuatshila Mukelenge Kilisto mudimu (Kolosai 3:23-24).

 

Lua lubilu

Wendeshe lukasa bua kulua kundi : bualu bua Dema wakandekela mumane kusua malu a pa buloba, wakaya ku Tesalonike ; Kulesekene wakaya ku Galatia ; Tito wakaya ku Dalamatia. Anu Luka nkayende udi nanyi. 4:9-11

Paulo udi ujinga kumonangana ne Timote mpala ku mpala. Udi umusengelela kabidi mu mvese 21 ne, Wendeshe mua kulua kundi tshidimu tshia mashika katshiyi tshianze kulua. Paulo wakamanya bimpe ne, Diba dianyi dia kuumuka mu buloba didi pepi, nunku udi ujinga bua kuikala ne Timote pabuipi nende bua kumusamba.

Dema wakamulekela, diambedi yeye wakadi muenji wa mudimu nende (Filemona 24), kadi kakitabuja bua kukengeshibueye pamue ne bantu ba Nzambi mumane kusungula malu a pa buloba. Kulesekene wakaya ku Galatia, katuena bamanye bua bualu buende nansha. Tito wakamana kuya ku Dalamatia, musangu mukuabo bua kuambila Bena Dalamatia Lumu Luimpe, kadi Mukanda wa Nzambi kawena utokesha bualu. Luka wakadi nende, Paulo wakamubikila ne, Munganga wetu munanga (Kolosai 4:14). Luka kakakuatshibua bundu ku mesu bua mulundu wende mu buloko !

 

Lua ne Mako

Wangata Mako, ulue rende, bua yeye udi mukumbane mua kunkuatshisha mu mudimu wa Nzambi. Nakatuma Tukiko ku Efeso. 4:11,12

Muntu ewu udi Yone Mako, kumpala Paulo wakela mpata bua bualu buende, bualu bua Mako wakumuka kudiye mu luendu lukuabo ne Lumu Luimpe. Paulo ne Banaba bakapanduluka bua bualu ebu, kadi mpindiewu udi usanka bua bualu buende, wakambila Timote ne, Udi mukumbane (Bienzedi 13:5, 13 ; 15:37-39). Kunyima, Nzambi wakasungula Mako bua kufunda Mukanda wa Lumu Luimpe lua Mako. Mu mukanda ewu, mufundi mulombodibua kudi Nyuma Muimpe udi utuleja Mukelenge Yesu bu Muena Mudimu wa tshishiki wa Nzambi, Muena Mudimu udi kayi upanga.

Tukiko wakadi mukuatshishi wa Paulo mu mudimu wa Lumu Luimpe. Paulo wakamubikila ne, Muanetu munanga wa mu Kilisto, muena mudimu wa lulamatu mu Mukelenge. Paulo wakamutuma ku Efeso ne ku Kolosai bua kumanyisha bena kuitabuja bua bualu buende ne bua kusamba mitshima yabo kabidi (Efeso 6:21 ; Kolosai 4:7).

 

Tshinkutu ne Mikanda ya Paulo

Tshinkutu, tshinakashiya ku Toa mu bianza bia Kapo, ulue natshi pawalua, ne mikanda kabidi, tshitambe mbiseba bidi ne meyi mafundapu. 4:13

Paulo kakadi ne bintu bia bungi nansha, wakalua muntu mupele bua mudimu wa Lumu Luimpe. Wakambila Bena Kolinto ne, Too ne ku diba edi tudi ne nzala, tudi ne nyota, tudi ne butaka, tudi tukumibua, katuena ne muaba wa kushindama (1 Kolinto 4:11). Kabi mpindiewu udi mu buloko, udi wela meji bua tshikondo tshia mashika ne bua tshizaku tshikadiye mushiye kua Kapo, mu musoko wa Toa. Udi musue mikanda yende kabidi, idi mua kumusamba mu dikenga diende. Udi ujinga nangananga kupeta biseba ne meyi mafundapu. Kale bakafunda mikanda pa biseba bia nyama, bu mbuji ne antelope. Biseba biakadi bivunga.

Tudi mua kudikonkangana ne, Malu bualu bua tshizaku, mikanda ne biseba bia Paulo, adi mafunda mu Mukanda wa Nzambi bua tshinyi ? Kaena metedibue tshianana nansha. Nzambi udi wela meji bua bualu buetu misangu yonso, udi wela meji bua bintu bikese bitudi nabi bualu kabidi.

 

Rédigé en langue Tshiluba par J. Robertson (Muambi Jean).

 

 

MALESONA KU MUKANDA WA EXESODE (11)

 

1.1      Kubanga kua luendu lua ku budishikaminyi

«Lumu luakafika kudi mukelenge wa Ejipitu ne, Bantu bakunyema. Palo ne bantu bende bakakudimuna mitshima yabo, bakamba ne, Tuakenza tshinyi patuakalekela Bena Isalele ku mudimu wetu ? Yeye wakalongolola dikalu diende, wakaya ne bantu bende. Wakangata makalu nkama isambombo masungula, ne makalu onso makuabo a mu Ejipitu ne tupita tua makalu onso. Yehowa wakakolesha mutshima wa Palo, mukelenge wa Ejipitu, yeye wakalonda Bena Isalele ; bualu bua Bena Isalele bakapatuka ne tshianza tshikole. Bena Ejipitu bakabalonda ne tubalu tuonso ne makalu onso bia Palo. Masalayi ende ne bantu ba pa nyima pa tubalu bakabapeta pakadibo bashikama pepi ne mayi manene, pepi ne Pi-hahilota kumpala kua Baala-sefona» (Ekesode 14:5-9).

 

1.2      Palo kena musue kulekela Bena Isalele nansha.

Bena Isalele bakabanga luendu luabo ku budishikaminyi bimpe. Bakumuka mu Ejipitu ne dikima, balongolola bimpe bu masalayi (13:18). Bakumuka ne ditekemena. Bakaya ne mifuba ya Yosefe, bakavuluka diyi diende ne, «Nfuafua, kadi Nzambi neikale nenu, neanuumushe mu buloba ebu, neanupingaje ku buloba buakalayeye Abalahama ne Isaka ne Yakoba... Nzambi neikale nenu, ne nuenu nenuye ne mifuba yanyi» (Genese 50:24,25). Bakumuka mu Ejipitu bua ditabuja. Bakalonda Yehowa, « wakaya kumpala kuabo mu ditutu, kubaleja njila, ne butuku mu ditutu diakadi ne dinkenke bua kubatemena mu njila ; bua bobo bamanye mua kuya ne munya ne butuku» (13:21). Bakenda bimpe, bakadi batangila mulu !

 

1.3      Bena Isalele badi bateka mesu kunyima.

Pakatekabo mesu kunyima bakatangila masalayi a Palo, bakatamba kutshina. Bakajiana Mose, bakamuambila ne, «Bua kukuatshila Bena Ejipitu mudimu budi butamba bua kufua mu tshipela buimpe». Mose, wakadi utangila mulu, wakabandamuna ne «Kanutshinyi, imanayi, numone lupandu lua Yehowa lualueye kunupa lelu ; bua Bena Ejipitu banuakumona lelu kanuena nubamona kabidi tshiendelele. Yehowa neanuluile mvita yenu, nenuikale polaa» (14:13, 14).

Bena Ejipitu badi tshifuanyikiji tshia malu a ba pa buloba adi akeba kutupingaja mu bupika bua malu mabi. Satana, nubikidibue ne, «Mukokeshi wa buloba», (Yone 14:30), kena usanka bikala bantu muinshi mua bukokeshi buende bamushiya bua kulonda Mfumu mupia-mupia. Udi uteta kubapingaja muinshi mua bukokeshi buende. Bualu bua Bena Isalele kabakateka mesu abo kudi Yehowa, bakadi pepi ne kupingana mu bupika butamba bupika buabo bua kumpala bukole. Bakapua muoyo ne, Yehowa wakabalombola too ne muaba awu. Kadi Mose wakamanya ne, Yehowa neajikije milayi yende yonso kutudi, wakakolesha mitshima ya bantu.

 

1.4      Bena Isalele badi basabuka Mayi Manene Makunze

Pakafika Bena Isalele ku mayi manene bakadi bu bantu mu buteyi. Kumpala kuabo kuakadi Mayi Manene Makunze, kunyima kuabo kuakadi masalayi a Palo. Nzambi wakadi pepi ne kupandisha bantu bende ne lupandu lunene ne kubayisha dilesona dinene ne, Kanuena bamanye mua kuenza tshintu tshimue bua kudisungila !

Nansha muntu umue udi mumanye mua kuenza tshintu tshimue bua kupeta lupandu. Mukanda wa Nzambi udi wamba ne, « Bualu bua nudi basungidibue ku ngasa bua ditabuja, ne diodi kadiena difuma kunudi, ndipa dia Nzambi ; kadiena difuma ku midimu, bua muntu kaditumbishi» (Efeso 2:8).

Yehowa wakambila Mose ne, «Ambila Bena Isalele ne, Baye kumpala» (Genese 14:15). Mose biende wakenza malu onso akamuambila Yehowa, «wakolola tshianza tshiende pa mayi. Yehowa wakatuma lupepele lukole lua ku esete, wakapingaja mayi butuku abu buonso, buloba buume buakamueneka kuakadi mayi, mayi akapanduluka. Bena Isalele bakaya mu bunene bua mayi pa buloba buume, mayi akadi bu tshimanu kudibo ku tshianza tshia balume ne ku tshianza tshia bakaji» (14:21, 22). Bena Isalele bonso bakapanduka, bonso bakatshina Yehowa. Nansha umue wakadi mujimine.

 

1.5      Muanjelo wa Nzambi udi ubalama

Muanjelo wa Nzambi, wakadi wenda kumpala kua Bena Isalele, wakumukaku, wakaya kunyima kuabo; ne ditutu diakumuka kumpala kuabo kabidi, diakimana kunyima kuabo. Ditutu diakadi pankatshi pa Bena Ejipitu ne Bena Isalele. Basalayi kabakadi mua kusemena pabuipi ne Bena Isalele butuku bujima. Nunku Nzambi wakalama bantu bende. Pakasabuka Bena Isalele bonso, pakatshia butuku mayi akapingana kabidi ne bukole buawu. Nansha muena Ejipitu umue wakapanduka. Muntu udi mumanye mua kuluangana ne Nzambi, nganyi ? Muntu udi mumanye mua kuluangana ne bantu ba Nzambi, nganyi ? - anu bikala Nzambi nkayende witabuja nunku. «Bikala Nzambi netu, nganyi udi mumanye mua kutupumbisha?» (Lomo 8:31).

 

1.6      Malesona Makuabo

1.6.1       Mayi a mayi Manene Makunze adi atuambila bualu bua kulumbulula kua Nzambi pamutu pa bena bupidia.

Mayi a Mayi Manene Makunze akadi lufu kudi Palo ne bantu bende, nansha muntu umue wakapanduka. Bena Isalele bakamanya mua kusabuka mayi pa buloba buume munyi? Bua ditabuja! «Bua ditabuja bakapita mu mayi Manene Makunze bu mudi pa buloba buume, pakateta Bena Ejipitu kuenza nunku, bakaminyibua mu mayi» (Ebelu 11: 29). Tuakamana kumona ne, Nzambi, pakalumbuluisheye Bena Ejipitu, wakadi mua kupita pa nzubu ya Bena Isalele bualu bua mashi a mukoko, (Nzambi kakapandisha Bena Isalele bualu bua bakadi bantu bimpe). Too ne katataka Nzambi udi utapulula bantu mu bisumbu bibidi - bena kuitabuja ne bena bupidia. Muena kuitabuja «udi ne muoyo wa tshiendelele, kena ulua mu tshilumbu, wakumuka mu lufu, wakubuela mu muoyo». Kadi, «udi upidia Muana kena umona muoyo, tshiji tshia Nzambi tshidi tshishala nende» (Yone 3:36).

 

1.6.2       Kusabuka kua mayi Manene Makunze kudi kutuambila bua lufu ne kubika ku lufu bia Mukelenge Yesu bua bualu buetu, ne bua malu mabi etu.

Tshiji tshia Nzambi tshiakapona pamutu pa Mukelenge Yesu Kilisto pakakengeye ku mutshi mutshiamakane bua malu mabi etu. Mavualu a Nzambi ne mambuanka onso a Nzambi akapita pamutu pende. (tangila Musambu 42:7). Mukanda wa Nzambi udi wamba ne, «Misulu ya mayi ya bungi kayena mimanye mua kujima dinanga» (Musambu wa Solomo 8:7). Nunku Mukelenge wetu, «muntu muakane, wakafuila bantu babi, bua kulua netu kudi Nzambi» (1 Petelo 3:18).

Patuitabuja Mukelenge Yesu Kilisto bu Musungidi wetu ne Mukelenge, tudi tumuka ku lufu, tudi tubuela mu muoyo «bu mudi pa buloba buume». Nzambi udi umona muena kuitabuja bu mufue ne Kilisto, mujikibue ne Kilisto, ne mubishibue nende (Efeso 2:5-8).

Bena kuitabuja ba bungi batshidi bamba ne, «Ka meme muena majia! Wansulula ku mubidi wa lufu elu, nganyi?» Kadi bikala muntu mumanye muaba wende mu Kilisto udi mua kuamba ne, «Ndi nsakidila Nzambi bua Yesu Kilisto Mukelenge wetu!» (tangila ku Lomo 7:24, 25 ; 8:1-6). Mukelenge biende udi Mupandishi munene.

 

1.6.3       Bu muakalongolola Nzambi mushindu wa kusungila Bena Isalele mu bianza bia Palo ne bantu bende kashidi, Yeye wakalongolola lupandu lunene bua kusungila bantu bende mu bianza bia Satana kashidi

Nzambi wakatuma Mose bua kupandisha Bena Isalele mu tshianza tshia Palo, kadi wakatuma Muanende munanga bua kutupandisha mu tshianza tshia Satana. Bua ku lufu luende «yeye amuvuije tshianana udi ne bukole bua lufu, ndiabolo mene; ne bua yeye apikule bonso aba bakadi bakuatshibue mu bupika matuku onso a muoyo wabo bua ditshina diabo dia lufu» (Ebelu 2:14). Nzambi «wakatupandisha ku bukokeshi bua midima, wakatubueja mu bukelenge bua Muana wa dinanga diende, utudi ne kupikudibua kuetu munda muende, nkujimija kua mibi yetu» (Kolosai 1:13, 14). Kakuena mukuabo udi mua kunyenga muena kuitabuja mu tshianza tshia Kilisto, anyi mu tshianza tshia Nzambi» udi mutambe bonso bukole» (Yone 10: 28, 29).

 

Rédigé en langue Tshiluba, par J. Robertson (Muambi Jean).

 

 

 

 

MALESONA KU MUKANDA WA EKESODE (20)

YEHOWA UDI UBENGA BUA MOSE ABUELE MU BULOBA BUA KANANA

 

2        Yehowa udi ne tshiji ne mose bualu bua Bena Isalele

Mose wakambila Bena Isalele ne, «Nakasengelela Yehowa ku tshikondo atshi, nakamba ne, Mukelenge Yehowa… witabuje bua meme nsabuke, ntangile buloba buimpe budi dishiya dia Yadene, mukuna awu muimpe, ne Lebanona. Kadi Yehowa wakadi nanyi tshiji bua bualu buenu, yeye kena mungumvuile; Yehowa wakangambila ne, Kuakujika, kungambidi bualu ebu kabidi». (Dutelonome 3:23-26).

 

3        Dipanga dia Mose mu tshipela tshia Sina

Mu tshipela tshia Sina bantu kabakadi ne mayi a kunua, bakatandangana ne Mose. «Yehowa wakambila Mose ne, Angata mulangala, usangishe bantu bonso ne wewe ne Alona mukulu webe, wewe wambile dibue didi ku mesu kuabo, dipatule mayi ; wewe neubapatuile mayi ku dibue, wewe neubanuishe mayi ne bimuna biabo». Mose ne Alona bakasangisha bantu bonso kumpala kua dibue, ne Mose wakambila Bena Isalele ne, «Umvuayi, bena kutomboka ; netunupatuile mayi ku dibue edi, anyi ? Mose wakabandisha tshianza tshiende, wakakuma dibue ne mulangala wende misangu ibidi ; mayi a bungi akalupuka, ne bantu bonso bakanua, ne bimuna biabo»(Nomba 20:7, 11)

Yehowa wakamba ne, «Wambile dibue», kadi Mose wakakuma dibue ne mulangala wende misangu ibidi, « wakamba biende meyi akadi kaayi ne meji ku mishiku yende» (Misambu 106:33). Bua bualu ebu Yehowa wakadi ne Mose tshiji, kakadi yeye mua kubuela mu buloba bua Kanana. (Nomba 20:12). Tuakamana kumona mu Ekesode 17 bu mudi Mose wakakuma dibue dia Holeba ne mayi akapatuka bilondeshile pa diyi dia Yehowa.Dituku adi Mose wakenza bu muakamuambila Nzambi. Mu tshipela tshia Sina yeye wakapanga. Dibue diakadi tshifuanyikiji tshia Kilisto mututshibue kudi Nzambi bua bualu buetu (Yeshaya 53:4, 5). Kilisto kakadi mua kukenga misangu ibidi bua bualu buetu ! (Tangila Ebelu 7:27 ; 9:25-28 ; 10:12).

 

4        Yehowa udi uleja Mose buloba bua Kanana

Mose wakaya ku mpata ya Moaba ku mukuna wa Nebo. Yehowa wakamuleja buloba bua mulayi, «Yehowa wakamuambila ne, Ebu mbuloba bunakalaya Abalahama ne Isaka ne Yakoba ne, Nembupe tunkanunuina tuenu, nakukulejabu ne mesu ebe, kadi wewe kuena usabukaku. Nunku Mose, muntu wa Yehowa, wakafua mu buloba bua Moaba muakamba Yehowa. Yehowa wakamujika mu tshibanda tshia buloba bua Moaba tshiakatangilangana ne Bete-peo ; kakuena muntu udi mumanye kudi lukita luende too ne ku dituku edi. Pakafua Mose, yeye wakadi ne bidimu lukama ne makumi abidi : mesu ende kaakadi bileshileshi ne bukole buende kabuakapua» (Dutelenome 34:4-7).

 

5        Mose udi umueneka ne Yesu mu butumbi

Bidimu bia bungi biakapita katshia Nzambi wajika Mose pa mukuna wa Nebo, kadi tudi tumumona kabidi pa mukuna wa kukudimuka. Mukelenge Yesu «wakangata Petelo ne Yone ne Yakobo, wakabanda nabo ku mukuna bua kutendelela Nzambi. Pakadiye utendelala Nzambi, mpala wende wakakudimuka, bilulu biende biakalua bitoke, biakengelela. Monayi, balume babidi bakadi bayikila nende, Mose ne Eliya ; bakamueneka mu butumbi, bakadi bamba bualu bua lufu luende luakambeye kujikija ku Yelushalema» (Luka 9:28-31).

 

6        Diyi didi difuma mu diulu

Petelo wakambila Yesu ne, «Mukelenge, patudi kunoko mbimpe ; biwasua, nengase bitanda bisatu, tshikuabo ntshiebe, tshinga tshia Mose, tshikuabo ntshia Eliya » (Matayo 17:4). Kakamanya tshiakadiye wamba. Nzambi kakitabuja Petelo bua kuteka Mukelenge Yesu mu mulongo umue ne Mose ne Eliya nansha, diyi diakalupuka mu ditutu ne, «EWU UDI MUANANYI MUNANGA, YEYE UDI UNSANKISHA BIMPE, MUMVUILAYI». Bayidi bakatshina bikole be, bakatua mpala panshi kadi Mukelenge wakabalenga tshianza, wakamba ne, «Bikayi kanutshinyi». Pakabandulukabo, kabakamona muntu mukuabo, ANU YESU. Mose, tshifuanyikiji tshia mikenji, ne Eliya, tshifuanyikiji tshia ba-profete, bakamana kuya, anu Yesu nkayende wakadi nabo.

Kunyima kua malu aa Petelo wakafunda ne, « Tuetu tuakadi bamonyi ba butumbi buende ku mesu etu… patuakadi nende ku mukuna awu wa tshijila » (2 Petelo 1:16-18). Pakasungula Mose bua kukenga ne bantu ba Nzambi mu Ejipitu, pakapidieye nzambi ya Ejipitu ne masanka a Bena Ejipitu bua kulonda Nzambi wa muoyo, wakasungula bimpe menemene. Bidi nunku ne muntu yonso udi ushiya malu a ba pa buloba bua kulonda Kilisto. Bumanyishi bua Paulo kudi Bena Lomo buakadi ne, «Bituakenga nende, mbua tuetu tutumbishibue nende. Bualu bua ndi mbala makenga a mu tshikondo etshi ne, Kaena makumbane bua kuelekeshibua ne butumbi budi buamba kumueneshibua kutudi» (Lomo 8:17, 18).

 

7        Malu makuabo bualu bua Mose

1) Bua bidimu makumi anayi Mose wakadi muyishibue mu lungenyi luonso lua Bena Ejipitu (Bienzedi 7:22, 23). Wakashala bidimu makumi anayi kunyima kua tshipela, ulama mikoko ya tatuende-muenu. (Wakayila malesona a bungi mu école wa Nzambi mu bidimu abi). Mose wakalombola Bena Isalele mu tshipela bidimu makumi anayi. Yeye wakamana kuyila ne, Meme bianyi tshiena mua kuenza bualu too, kadi Nzambi udi mumanye mua kumpa lungenyi, bukole ne bintu bionso bindi nabi bualu bua kumuenzela mudimu.

 

2) Nzambi wakalaya Bena Isalele Muprofete mufuanangane ne Mose.Mose wakambila bantu ne, « Nenumvue diyi diende … muntu yonso udi upidia kumvua meyi anyi adiye wamba mu dina dianyi, meme nenkose tshilumbu tshiende » (Dutelonome 18:15-19). Muprofete ewu wakadi Kilisto (Yone 5:46).

 

3) Mose, muntu wa Nzambi, wakadi wa kueyemenyibua «mu nzubu wa Nzambi muonso» (Ebelu 3:1, 2). «Muntu ewu Mose wakadi ne kalolo be, wakatamba bantu bonso ba pa buloba ne kalolo» (Nomba 12:3-8). Mu malu aa onso wakadi tshifuanyikiji tshia Kilisto (Matayo 11:29 ; Ebelu 3:5, 6).

 

4) Mose wakadi ne mapumbisha ne mateta a bungi kadi Nzambi wakamulama mu malu ende onso. Mose wakalonda Nzambi menemene ne Nzambi wakamupesha butumbi ne buneme. «Yehowa wakayikila ne Mose mpala pa mpala bu mudi muntu uyikila ne mulunda wende» (Ekesode 33:11 ; Nomba 12:7, 8).

 

Pakajikija Mose kuenza mu tshikondo tshiende malu akasua Nzambi, Nzambi wakamuangata. Paulo, muntu wa mushindu wa Mose, wakafundila basanto ne bana betu bananukidi ba mu Kilisto Yesu ne, «Malu onso anudi nuenza, nuenze ne mitshima yenu bu munudi nuenzela Mukelenge ; kembu munudi nuenzela bantu ; bualu bua nudi bamanye ne, Netuangate difutu dia bupianyi kudi Mukelenge.Nudi nukuatshila Mukelenge Kilisto mudimu» (Kolosai 3:23, 24). Mukelenge Yesu wakamba ne, «Biangenzela muntu mudimu, andonde ; muena mudimu wanyi neikale kundi ngikala ; biangenzela muntu mudimu, Tatu neamutumbishe» (Yone 12:26). Malu adi mafunda mu mukanda ewu mukese akoleshe mitshima yetu bua kuenzela Mukelenge mudimu.

 

Rédigé en langue Tshiluba par J. Robertson (Muambi Jean).