Yesu la Nikodemo

Alola Yoane 3 : 1-21

 

Bofalise omodi, dina inandi Nikodemo, oki ont’on’onene nd’atei and’asi Yuda ; and’oyakaki ele Yesu l’otsho, aolouwul’ayandi, Labi, isho yeyaka mbo, W’oyadi wekyi oyakaki m’ele Nkumu Ndjei, l’olok’onda lak’onto ondeya ikela nimb’ikelawe nkina Nkumu Ndjei apoyadi l’andi Ko Yesu aolamb’ayandi, Sosolo, sosolo, nshokosangel’ayemi, Nkin’onto opotshw’end’oto and’apokusi yilama nda wapemel’ona Nkumu Ndjei. Nikodemo apepaki, l’an’onduwulaki mbo, m’ayadi onto engambe, and’aokeya yotshwa sheleko ? And’aokeya yuta nd’ikundju ina nyango la yita yotshwa ? Ko Yesu onduteyaki djoi ayandi, Sosolo, sosolo, nshokosangel’ayemi, nkin’onto opotshwe l’ashi la ele Nyuma and’apokusi yena wapemel’ona Nkumu Ndjei. Ombotshw’el’ounu ole nk’ounu ; ombotshw’ele Nyuma ole nyuma. Ko and’aoluta yosangel’ayandi, toshashimwaki nda djoi ikosangel’emi mbo, diyadi d’inyo yotshw’end’oto ; epelele ipupaka mpen’elang’eko, la we yokaka oposo ond’eko, ayi w’opeyi wudi oyak’eko la w’opeyi wudi okend’eko ; onto l’ont’ondotshw’ele Nyuma oyadi nko shiko. Nd’etamb’esoko Nikodemo onduwulaki Yesu ayandi, baoi ane baokokelama sheleko ? Yesu onduteyaki djoi ayandi, w’ondoyadi wekyi ond’asi Yuda ko w’opopokw’aoi ane ? Sosolo, sosolo, emi nshokosangel’ayemi, Ish’isangak’aoi aiko andey’isho d’ish’isambedyak’aoi anen’isho, ko iny’opambody’aoi aiko ateped’isho. Nkina iny’opambody’aoi ana motshi ane alosangel’emi, sheleko ekambody’inyo asangalom’emi aoi anda loola ? L’and’aolosangel’ayandi, Lak’onto aolulela nda loola pe nk’oiko ondokitela ma loola, Bon’on’Onto, and’iko ayadi nda loola. La sh’eki Mose wuledyaka ndjwa nd’oshwe, diyadi l’On’on’Onto yuledyama nko shiko in’onto l’onto onimedya, ate lomo londa diiyo. «L’olak’ona Nkumu Ndjei alekolaki yok’asi motshi olango and’okaaki On’onandi ikinda mbo, Onto l’onto onimedya atopitanaki ayi ate lomo londa diiyo» Yoane 3:16.

Osi Yuda one, Nikodemo aki Bofalise o la wekyi ond’aoi ana Nkumu Ndjei nd’atei and’asi Yuda ; shene and’oki bolaki on’anto ankina. Nkul’and’oki ont’on’onene nd’atei an’ankina, and’o mele aolelengana l’onoi nd’otem’onandi onda yotshumya mboka. Andi menge okendaki nda widima ko and’oyakaki ele Nkumu Yesu nd’iyasa aoi anda iyani inda lomo. Akiandi wokak’osak’onda Yesu and’aoyala la mpos’enda yok’aoi anandi, mbo, mang’and’ayadi l’aoi anda iyani m’ele Nkumu Ndjei. Ko Nikodemo okendaki ele Yesu l’otsho. Djoi ine iyadi shena nimba. Widim’okiako nd’otem’on’ont’one ; nd’otem‘onandi oki widim’onda tshuu. Afalise pala baokanedya mbo, Isho toyadi d’iyani, ayi Nikodemo aoleya mbo, ndjadi nda widima, sheko ekiandi ayakak’ele Yesu. Yesu aolamba l’oshadu, aolimedya ipulula l’andi la yotshumya mbok’enda lomo.

 

Nikodemo aolangola isangela Nkumu Yesu ayandi, Isho yeyaka mbo, W’ende wekyi m’ele Nkumu Ndjei la isho ipepaka nd’aoi aiko akelawe nd’atei an’anto. Ko Yesu aolutola djoi ayandi, Ont’opotshwe m’adiko apokusi diyala nda wapemel’ona Ndjambi. Nkumu Yesu atoki nko wekyi m’ele Ndjambi ; and’aki Ndjambi menge. Sheko andi atolanga yulama l’ont’oiko la yikya l’andi ikokodi ind’aoi aki Afalise atepelaka. Nkumu Yesu oyakaki na motshi d’iyosangel’anto aoi anda sosolo ana Ndjambi sheko and’osangelaki Nikodemo ditshin’ind’aoi aiko. W’olanga ishashala l’aoi anda lomo ? W’olanga yilama nda wapemel’ona Nkumu Ndjei la yeya insoi itshwakol’andi auto anandi ? Ko diyadi la we yuta yotshwa m’ele Ndjambi menge. Nikodemo aokanedya djoi inda yotshwa nda djongi ; ayi Nkumu Yesu osangaki djoi inda yotshw’end’oto. Ont’edimba yuta yetama nd’ikundju ina nyango la yita yotshwa iyan’ind’itshila, and’apongoyala la lomo ond’oto ; aokota nko la lom’oiko ond’elengelengi oki el’andi nd’oso. Yesu osangelaki Nikodemo ayandi, Osotshw’el’ounu ole nk’ounu. Nkin’ishangema iyotshw’ele nyango end’ishangema, ik’ikoyala onkoko nkina nta, eleko ? Lako ; ik’ikoyala ishangema. Ko topongeya iyal’asi wapemel’ona Ndjambi nkina tombotshw’iyotsh’in’ounu ontulu. Telengana d’iyotsh’ind’oto ; iyotshi m’adiko, m’ele Nkumu Ndjei. Alolaka Yoane 1:12,13. «Ayi and’okaak’aiko anambaki mpipo enda iyal’an’ana Ndjambi, baiko baolimedya dina inandi. Iy’atotshwe m’ulungu nkina nda olang’on’ounu, nkina nd’olang’on’onto, ayi m’ele Ndjambi». Ishangem’idimba yetama nd’ikundju ina nyango yetam’enkam’esato, iko ikuta yotshwa pe nk’ishangema. Yotshw’end’oto eyadi djoi ishamb’ont’okidi mele. Yuta yotshwa shene eyadi na mpamb’ena Nyum’end’Olotshi. Aya Yesu mbo, L’ashi o la Nyuma. Ashi ayadi nimb’end’aui ana Nkumu Ndjei. Nkina w’ombok’aoi aiko nd’otem’ondawe, apa aoi aiko antulu, ko nkin’o Nyuma mele aokamba l’ako nd’otem’ondawe, w’okuta yotshwa ; w’okotswa’end’oto ; w’okotshwa m’adiko la w’okeya yilama nda wapemelo one ond’oto onda loola, djoi inda os’oun’ontulu apokusi diyala nkoko. Os’ounu aokoshashala yilam’otshwako nd’etetenyi epa l’aoi an’ounu ? Lak’emba ! Ko pe nk’aiko baolotshw’end’oto baokeya diyal’asi wapemelo oiko.

 

Rédigé en langue Ikela par J. Barnes (Kitoko).

 

 

 

 

LWEMBO 3

 

Lwembo londa Davidi aki bon’onandi

Abasaloma akimanaka l’andi

 

1. Ndjadiako, bantonyi banami baophula;

Banto eusa baoludwa inda yuna l’ami boshela;

 

2. Banto eusa baosanga djoi inda lomo lonami mbo;

And’aphongaya yika m’ele Nkumu Ndjei; Sela. (*)

 

3. Ko we, Ndjadiako, w’omonyinga o shena nguwa;

W’oyadi ditombya dinami, w’oluledya botsh’onami.

 

4. Ndokoonda Ndjadiako, la lolaka lonami,

L’andi aokonduteya djoi ma bokoto bonandi bond’ekila. Sela.

 

5. Emi ndoletama, ko ndolaya ilo;

Ndoletshwa l’olok’ona Ndjadiako ayadi dinsukaka.

 

6. Nkula belomba ben’enene ben’anto baonsamanya,

Inda dinkelel’ombe, mpongoka bophodu.

 

7. Etshwaka we Ndjadiako, ondikyaki we Ndjambi enami;

Djoi inda w’ombokphula bantonyi anami nda itama;

W’obulaki baino band’akedi ban’embe.

 

8. Yika eyadi m’ele Ndjadiako;

Botshwal’ondawe bole el’anto andawe. Sela.

 

(*) Dikadimola inda djoi ine «Sela», mbo ; «Shilama phele ; kanedyaka mpima». Ayawe ; Ulamaka wee, okanedye baoi banc Ndjambi.

 

Lwembo lone loyadi ashimba mele. Isho yeyaka sh’eki Abasaloma, bon’ona nkumu Davidi wengesanelaka ishe, aolanga diphonola bokitshwa m’el’andi. Ko Davidi l’anto anandi baoluta nd’ekoto. Akiandi mpiko andi okotaki lwembo lone ele Nkumu Ndjei, Ndjambi enandi. (Alolaka nda 2 Samwele 15-18) Santo phala andjelaki Abasaloma, ko diyaki la Davidi yuna la banto baiko boshela. Aye andi atophela Ndjadiako, Ndjambi enandi. Nkumu Davidi aolekama nk’el’andi betsho beuma. Ko djoi inandi ind’ososo iyadi dina ina Ndjambi enandi, mbo ; Ndjadiako. Dina ine ditekyaka mbo ; Andi akiako, andi alako, andi aokoyala elengi ndi diiyo. Davidi ondosangelaki mbo ; Ndjambi enami, we yenaka mbo ; Bantonyi banami baondekola phala ; nkela nde sheleko ? Iyo baolemala inda yuna l’emi boshela ; baosanga ayiyo ; Ndjambi aphongootana. Davidi mbo ; Sela ; ayawe ; «Shilama phele ; nkanedyaki djoi ine». Ayadi sosolo mbo ; Ndjadiako mele aphongotana bon’onandi ? Bophoto ! Nkina ndjadi bona bonandi, andi aphongontona, aphongontshika nkula wina bophoko. Ko Davidi aolophwa dikotomedya ina Ndjambi la losaseka lonandi. Nkina and’ayadi Isoke inami, and’aphongondokya nsonyi nd’os’onda bantonyi banami ; aokondikya. Davidi aolophwa sh’eki Nkumu Ndjei nguwa enandi nd’etsho eki Saulu wokindjaka elu ; andi aolimedya mbo ; And’aokuta indikya m’ele bantonyi ankin’ane.

Nkumu Ndjei ayaki ditombya dinandi. Abasaloma olangaki diphita ditombya inda ishe l’andi o mele diyala nkumu end’asi Isalele ; aye ditombya diko inda Davidi ditoki ditombya inda Davidi o mele ; Ndjadiako ayaki ditombya dinandi, ko Abasaloma atoki la mpamba enda yoimola ma djowa ine. Aki Nkumu Ndjei wokosaka nsadi enda esonelo enandi, andi okambaki la mpamba enandi inda ditomanya bonkambi onandi nkoko.

Ko Davidi okotaki ayandi ; «Ndjadiako aokonduteya djoi ma bokoto bonandi bonda ekila» (v.4). Djoi iki Abasaloma akelaka iki djoi in’ombe, apha djoi ind’olotshi. Ko Nkumu Ndjei yesanyaka ekila enandi mele. Andi aphimedye bakedi band’aoi ban’embe diphita ekila enandi. Sheko, aki Abasaloma atonaka Davidi, andi otonaki o la Ndjambi enda Davidi. Ayadi olotshi isho yophwa djoi ine. Bantonyi bayadi ditotonaka djoi inda toyadi basi Kilisto YOTONAKA O L’ANDI MELE ; l’andi aokotesanya la mpamba enandi enda diiyo.

Davidi aki nd’atei and’oshela ; andi atoki nd’atei and’ola, aye and’aki nd’oshwe bona mpampa, lako l’etetenyi end’olotshi enda yishamelo ; aye andi okotaki ayandi ; «Ndoletama ko ndolaya ilo». Andi aolutsha olotshi akiandi wophwaka mpamba enda Wesanyi bonandi, Nkumu enda bya. Ayandi ; Nkula belomba bendiyo baonsamanya inda dinkelel’ombe, mpongoka bophodu. Nkina w’oyadi la bophadi bolekola bantonyi andawe mpamba, w’ophosambi diwa l’ophodu. Nkin’andi dilangaka we diwa, w’okowa ; ko nkin’andi dilangaka we ditshikala la lomo inda yokambela bolemo, bantonyi andawe bauma baphoyadi la mpamba enda dikokelela djoi iphoko. Bolotshi ondiso yophwaka mpamba enandi la wina la wina.

Ko nkumu Davidi aolotsha Ndjadiako mbo ; Etshwaka, ondikyi we Ndjambi enami. Davidi yoetaka mbo ; Ndjambi ENAMI ; apha phe nko Ndjambi. Ndjambi osonaki Davidi, aye Davidi osonaki Ndjambi and’o mele. Nkuwuli isoke ; Ndjambi ene ale Ndjambi endawe mele ? Nkina w’oyadi isosoke inandi, andi ayadi Botomanyi bondawe.

Davidi osangaki mbo ; Ndjadiako enami okphulaki bantonyi banami nda ditama. Djoi ine iyadi shena nshawo. Davidi aolena bantonyi anandi shena nyama inda ishangema, nga nkoi. Nkina w’okphula nkoi nda itama, nkina w’obula baino band’iko, ik’iphongeya dikodiaka. Shene Ndjambi okphulaki bantonyi bana nkumu Davidi, aolimola mpamb’endiyo enda yokelel’ombe.

La nkuma, Davidi aolemba lwembo londa boshadu ayandi ; Yika ene eyadi m’ele Ndjadiako. Lako one ; Davidi olekolaki bantonyi mpamba la wanya bonandi mele ; aye Ndjadiako ondalekolaki la mpamba ENANDI, l’andi aolikya bonkambi bonandi. Ko Davidi aolemba lwembo lonandi lone lond’oshadu mbo; Botshwalo bondawe ole ele banto bandawe. Sela. Okanedye djoi ine isoke. Nkina tole l’otshwalo, tole l’oko phe nko m’el’andi. Basi motshi ine yeyaka phe nko ditolamba wambo; Nkumu endiso yeyaka ditotshwakola insonyi inda sosolo l’ind’otshwako.

 

Rédigé en Langue Ikela, par J. Barnes (Kitoko)

 

 

 

 

 

MAKO 9:1-29

 

N’empudi ene isho tombalola inda diphaningwa ina Nkumu Yesu. Ko diyadi d’sho yophwa mbo; Nd’esuka enda Tshapita 8 andi osangelaki baeki banandi djoi inda bewedi onandi (v.31). Isho yeyaka mbo; Baeki bayaki la Yesu lolango londa sosolo, la iyo batolanga yena elu enandi ekiandi wasangelaka. Petero olangaki yosuka, ko Nkumu Yesu ondophaphwangaki mbo; Lekaka m’okongo onami, Satana. Andi olangaki disuka Nkumu l’olimo bonandi bokiandi akambelaka Apha. Ko n’empudi ene isho yenaka mbo; Elu eki Nkumu Yesu akindaka lako esuka enda djoi. Nd’oso bonandi ayadi ditombya nd’atei an’anto bya ana ndjei. Ko nda v.1 andi aosangela baeki baiko mbo; “Bamodi bandiyo bayadi yemalak’ane baphongowa elengi ndi anenalom’iyo waphemelo bona Nkumu Ndjei boyoyi la mpamba. Iyo baokanedya ayiyo; Nkumu endiso aokoyala Nkumu end’asi Yuda lak’elengi, l’andi aokokima basi Romo la baphaya ankina ma motshi indiso. Aye, aki betsho botoa alekaka Nkumu okolaki baeki basato, Petero la Yakoba la Yoani, l’andi okendaki, aolunda d’iyo nd’adiko anda bokoto bond’otali. Mpiko Nkumu Yesu ophaningwaki nd’os’ondiyo la iyo basato baolena ditombya dinandi diko dikiandi wasangelaka nd’oso. Iy’aolena mbo; Nkula Nkumu Yesu aotonama na motshi, nkul’anto baokoodjaka nda kuruse, m’okongo andi aoketshwalomi m’ewedi, aokophikamalomi nda ditombya ina Nkumu Ndjei. Nkumu Yesu olangaki iyo yeka yekelo ene end’iko. Nkumu endiso aki Bonto, sosolo, akiandi na motshi; ko, andi aokotshikala Bonto botshwako. Aye, akiandi ane, baolosoka; nda ditombya mpiko baokoophika. Akiandi ane iyo baolodjaka; mpen’eyadiandi nda ditombya ina Ndjambi andi ale Nkolo ya lomo londa diiyo. Mpamba enda lomo loiko eyadi el’andi, ko andi yeyaka dikaya baeki banandi lomo inda iyo diyulama l’andi na ngedingedi enda ditombya.

Baeki baolena banto aphe wemi l’andi nda ditombya diko, Mose la Eliya. Lomo lond’iyo na motshi oshilaki elengelengi. Eliya okolamaki nda pusupusu enda tsha, aye Ndjadiako and’o mele okundaki Mose (Phalaka 2 Bankumu 2, la Eophwelo enda Dingembe 34:6). Sheleko eki bele beiko bephe wenamaka l’andi nd’okoto na ? Djoi inda ditekya mbo; Anenamalomi Nkumu Yesu nda ditombya dinandi, andi aphongenama nk’o mele; banto banandi baokenamalomi la Nkumu endiyo; nkula baiko bawaki elengi, nkula baiko baokokolama l’andi ma motshi nda wina boyakalomiandi inda diyokola ekelizia enandi.

Isho yeyaka mbo; Bele en’ephe, Mose la Eliya, baophulula la Nkumu. Djoi inkono ikiyo aphululaka iyo l’andi ? Mako aphotosangele, aye Luka aotosangela mbo; «Iyo baotephela l’andi djoi inda bewedi onandi bokiandi wasaka diwa nda Yelushalema». Ko, tophwe mbo; Sosolo andi oki la djoi inda ditowela, aye m’okongo bonda bewedi bonandi wina onda ditombya bokoyela, la Nkumu olangaki baeki banandi dikophola djoi diko.

Akiyo wenaka ngedingedi enda ditombya Petero osangelaki Nkumu mbo; Wekyi, oyadi bolotshi isho yulama ane; bolotshi isho toshumye tolombe tosato, imodi djoi indawe, imodi djoi ina Mose, la inkina djoi inda Eliya. Sosolo aki bolotshi iyo diyala nda bokoto, aye lak’olotshi iyo disanganya Nkumu la benkambi ene shiko. Bolotshi isho baumela yeya mbo; Yesu Kilisto ayadi ND’OSO ONDA BAUMELA. Paulu okotaki ele basi Kolosai mbo: «Andi ale BOTSHA onda djongi, ayawe, ekelizia; andi ale ANGOLELO, NSOMI m’atei banda bawaki, in’andi diyala l’etetenyi enda BOSO». Shene Petero aolunga nda isanga djoi ine. Sheko dilenga ina ngedingedi ikitelaka, indakukaki, ko iyo andokaki lolaka m’atei anda dilenga asanga djoi ine mbo; «One ayadi Bon’onami olangemi; lookodyaka» (v.7). Ko aki dilenga dina ngedingedi alekaka, iy’aolena phe nko Yesu andi mele. Nkumu Ndjei dilangaka isho yena phe nk’Ona bonandi, Yesu. Lako bonkina boyadi nd’iyedi inandi; andi ale nd’adiko anda bauma, nd’os’onda bankina bya, la Apha dilangaka isho yophika la yoyela la yokodyaka nk’andi.

M’okongo bonda djoi diko, baeki ane akyakephaki, ko ankina baphe batshwaki, aotshikala phe nko Yesu. Tophwe lolaka lone mbo; PHE NKO YESU. Diyadi di’isho yeya mbo; Nd’aisho bana Nkumu Ndjei, BONTO OPHOKO ontulu oleko, Bon’onandi Yesu Kilisto, l’andi dilangaka o la isho diyala l’andi nd’etema bendiso shene.

Ko aki Yesu la baeki ane basato akitelaka ma bokoto, andi ondakekemyaki ayandi; «Lotosangelaki nkul’onto djoi ikinyo wenaka elengi ndi andetshwalomi Bon’on’onto m’ewedi». Sheleko ekiandi alangaka iyo yumba baoi ane banda sosolo lako disangel’ankina ? Djoi inda basi Yuda baoshila yoka djoi inandi, baoshila yotona. Nkumu Ndjei ondakaaki djowa ind’olotshi inda iyo yimedya, ko iyo batolanga yimedya. Shene, Nkumu atolanga baeki yasangela baoi bakiyo wenaka nda bokoto bonda ditombya. Ko baeki baolumba baoi ane banda diphepha nd’etema bendiyo elengi. Petero aotosangela djoi ind’ako n’onkanda bonandi bond’oso. «Djoi inda isho totoyela besako ma mpima en’anto akiso alosangelaka mpamba enda eyelo ena Nkumu endiso Yesu Kilisto, aye isho toki baenyi banda ditombya dinandi l’aisho. Djoi in’andi aolamba lophiko la ditombya m’ele Nkumu Ndjei, Ishe endiso, aki djoi ayakaka el’andi ma Ditombya diko inda bolotshi bolekola, mbo; Bona bonami one ondok’emi lolango; andi aonshashadya».

Nkumu Yesu ondakekemyaki ayandi; Lotosangelaki onto baoi bakinyo wenaka elengi ndi andetshwalomi Bon’on’onto ma bewedi. Ko baeki aiko basato baolambya baoi baiko nd’etema bendiyo aye iyo lako dikophodya djoi inda yetshwa m’ewedi, la iyo baoluwulana mbo; Yetshwa m’ewedi ene eyadi no ? Ko iyo baoshila yena baoi baoi basato banda yetshwa m’ewedi; bona bon’omoto, bonda dwele bonda wadi oki bodwo na Nayina, o la Lasalo. Sheleko ekiyo batophokwa djoi ine ? Isho yeyaka mbo; Baeki batolimbitela baoi phala elengi ndi wina oyulama Nyuma nd’etema endiyo, bonto l’onto. O la isho toshila yamba bokakaya bona Nyuma. Timedye andi ditotana l’aoi ane banda diphepha.

 

Rédigé en langue Ikela, par J. Barnes (Kitoko).