MUKANDA YA NTETE YA YOANI

         Yina vandaka tuka luyantiku, yina beto waka, yina beto monaka na meso na beto, yina beto talaka mbote—mbote ye nde maboko na beto simbaka, yina me tadila ndinga ya luzingu 2 (ye luzingu monisamaka ; ye beto monaka, ye beto ke kuta kimbangi, ye beto ke zabisa beno luzingu ya mvula na mvula, yina vandaka mfinama ya Tata ye yina monisaminaka beto) ; 3 yina beto monaka ye waka, beto ke zabisa beno yo, na mpila nde beno mpi kuvanda kintwadi ti beto : Kintwadi na beto ikele ti Tata ye ti Mwana na Yandi Yezu Klistu. 4 Ye beto ke kusonikila beno mambu yai, na mpila nde kiese na beno kuvanda ya kulungisama.

         5 Ye ikele yai nsangu ya beto kuwaka na yandi ye nde beto ke kuzabisa beno, [kuzaba] nde Nzambi ikele nsemo ye nde kati na yandi mudidi ata mosi ikele ve.

         6 Kana beto ke kutuba nde beto ikele na kintwadi ti yandi, ye nde beto ke kutambula na mudidi, beto kekusa ye beto ke sadila kieleka ve ; 7 kansi kana beto ke kutambula na nsemo, bonso Yandi mosi ikele kati na nsemo, beto ikele na kintwadi ba mosi na ba ya nkaka, ye menga ya Yezu Klistu Mwana na Yandi ke kugedisa beto na disumu yonso.

         8 Kana beto ke kutuba nde beto ikele na disumu ve, beto ke kudikusa beto mosi, ye kieleka ikele kati na beto ve.

         9 Kana beto ke kufunguna masumu na beto, Yandi ikele nkwikisi ye masonga sambu na kulolula masumu na beto ye kugedisa beto na mbi yonso.

         10 Kana beto kutuba nde beto sumukaka ve, beto ke kumisa Yandi muntu ya luvunu ye ndinga na yandi ikele kati na beto ve.

         Bana na mono, mono ke sonikila beno mambu yai na mpila nde beno sumuka ve ; ye kana muntu mosi kusumuka, beto ikele na nzonzi mfinama ya Tata, Yezu Klistu, muntu ya masonga ; 2 ye Yandi ikele nkayilu ya kukatula ya masumu na beto, ye kaka ve sambu na yina ya beto, kansi mpi sambu na insi—ntoto mvimba.

         3 Ye na nzila yai beto kuzaba nde beto kuzaba Yandi, [kuzaba] kana beto ke kuzitisa ba lutumu na yandi. 4 Yina ke kutuba : Mono kuzaba Yandi, ye ke kuzitisa ba lutumu na yandi ve, ikele muntu ya luvunu, ye kieleka ikele kati na yandi ve. 5 Kansi konso muntu yina ke kuzitisa ndinga na Yandi, —kati na yandi zola ya Nzambi ikele ya kulungisama kieleka : Na nzila yina beto kuzaba nde beto ikele kati na yandi. 6 Yina ke kutuba kuzinga kati na Yandi, fetele mpi yandi mosi kutambula bonso yandi tambulaka.

         7 Ba zolama, mono ke kusonikila beno ve lutumu ya mpa, kansi lutumu ya ntama ya beno bakaka tuka luyantiku. Lutumu ya ntama ikele ndinga ya beno kuwaka. 8 Mbala mosi diaka, mono ke sonikila beno lutumu ya mpa, yina ikele ya kieleka kati na Yandi ye kati na beno, sambu nde mudidi ke kwenda ye nde nsemo ya kieleka ke kungenga ntete. 9 Yina ke kutuba kuvanda kati na nsemo ye ke kumenga mpangi na yandi, ikele kati na mudidi tii ntangu yai. 10 Yina ke kuzola mpangi na yandi ke kuzinga kati na nsemo, ye kati na yandi ikele dibaku ya kubwa ve. 11 Kansi yina ke kumenga mpangi na yandi ikele kati na mudidi, ye yandi ke kutambula kati na mudidi, ye yandi ke kuzaba ve na wapi yandi ke kwenda, sambu nde mudidi me kufwa meso na yandi.

         12 Mono ke kusonikila beno, bana, sambu nde masumu na beno me lolukila beno na zina na Yandi.

         13 Mono ke kusonikila beno, ba tata, sambu nde beno kuzaba yina ikele tuka luyantiku.

         Mono ke kusonikila beno, ba ngunza, sambu nde beno me nungaka muntu ya mbi.

         Mono ke kusonikila beno, bana ya fioti, sambu nde beno kuzaba Tata.

         14 Mono sonikilaka beno, ba tata, sambu beno me zaba yina ikele tuka luyantiku.

         Mono sonikilaka beno, ba ngunza, sambu nde beno ikele ngolo, ye nde ndinga ya Nzambi ke kuzinga kati na beno, ye nde beno me nungaka muntu ya mbi. 15 Beno zola ve insi—ntoto, ata mambu yina ikela na insi—ntoto : Kana muntu mosi kuzola insi—ntoto, zola ya Tata ikele kati na yandi ve, 16 sambu nde yonso yina ikele kati na insi—ntoto, kulula ya nsuni, ye kulula ya meso, ye lulendo ya luzingu, ikele ya Tata ve, kansi ikele ya insi—ntoto ; 17 ye insi—ntoto ke kwenda ti kulula na yo, kansi yina ke kusala luzolo ya Nzambi ke kuzinga mvu na mvu.

         18 Bana ya fioti, yai ikele ntangu ya nsuka ; ye bonso beno waka nde ntedimini  Klistu ke kwisa, ntangu yai mpi ba ntedimini Klistu ikele mingi, na nzila na yo beto kuzaba nde ikele ntangu ya nsuka : 19 Bo basikaka kati na beto, kansi bo vandaka ya beto ve ; sambu kana bo vandaka ya beto, bo zolaka kuzinga ti beto ; kansi na mpila nde bo kuvanda ya kumonisama bonso na kuvandaka ve mosi [na bo] ya beto. 20 Ye beno, beno ikele na kupakulama katuka na yina ikele Santu ye beno me kuzaba mambu yonso. 21 Mono me kusonikila beno ve sambu nde beno me kuzaba kieleka ve, kansi sambu nde beno kuzaba yo nde ata luvunu mosi ve ta katuka na kieleka. 22 Nani ikele muntu ya luvunu, kana ve yina ke kubuya nde Yezu ikele Klistu ? Yandi yina ikele ntedimini ya Klistu, yina ke kubuya Tata ti Mwana. 23 Konso muntu yina ke kubuya Mwana [yandi] mpi ikele na Tata ve ; yina ke kutuba sambu na Mwana ikele mpi na Tata. 24 sambu na beno, nde yina beno waka tuka luyantiku kuzinga kati na beno : Kana yina beno kuwaka tuka luyantiku kuzinga kati na beno, beno mpi ta kuzingaka kati na Mwana ye kati na Tata. 25 Ye ikele awa lusilu ya Yandi silaka beto, —luzingu ya mvula na mvula. 26 Mono sonikilaka beno mambu yai na yina me kutala ba yina ke kuvidisa beno ; 27 ye, sambu na beno, yina beno bakaka kati na yandi kuzinga kati na beno, ye beno ikele na mfunu ve nde muntu kulonga beno ; kansi bonso kupakulama yai ke kulonga beno na yina me kutala mambu yonso, ye longaka beno, beno ta kuzinga kati na yandi.

         28 Ye ntangu yai, bana, beno kuzinga kati na Yandi, na mpila nde, ntangu Yandi ta kumonisama, beto kuvanda na kusiamisama ye nde beto kuwisama nsoni ve, na Yandi, na kwisa na Yandi.

         29 Kana beno kuzaba nde yandi ikele nkwikisi beno zaba nde konso yina ta kusadila masonga me kubutuka na yandi.

 Beno tala inki zola Tata pesaka beto dikabu, nde beto kubingama bana ya Nzambi; yo yina insi—ntoto kuzaba beto ve, sambu yo zabaka Yandi ve. 2 Ba zolama, beto ikele ntangu yai bana ya Nzambi, ye yina beto ta kuvanda me kumonisama ntete ve ; beto kuzaba nde ntangu Yandi ta kumonisama, beto ta kufwanana na Yandi, sambu beto ta kumona Yandi mutindu Yandi ikele. 3 Ye konso muntu ikele na kivuvu kati na yandi ke kudigedisa, sambu Yandi ikele gedila.

4 Konso muntu ke kusala disumu, ke kutambula ya kukonda nsiku, ye disumu ikele kukonda nsiku. 5 Ye beno kuzaba nde Yandi monisamaka, na mpila nde Yandi kukatula masumu na beto ; ye ikele na disumu ve kati na Yandi. 6 Konso muntu ke kuzinga kati na Yandi ke kusumuka ve ; konso muntu yina ke kusumuka me monaka Yandi ntete ve.

7 Bana, nde muntu mosi ve kuvidisa beno : Yina ke kusala masonga ikele muntu ya masonga. 8 Yina ke kusala disumu ikele ya diabulu, sambu tuka luyantiku diabulu sumukaka. Sambu na yai nde Mwana ya Nzambi monisamaka, sambu Yandi kubebisa bisalu ya diabulu. 9 Konso muntu yina me kubutuka na Nzambi ke kusala disumu ve, sambu nkeni ya Nzambi ke kuzinga kati na yandi, ye yandi lenda sumuka ve, sambu yandi me kubutuka na Nzambi. 10 Na nzila ya yai me [kumisama] ya kumonana bana ya Nzambi ye bana ya diabulu : Konso muntu yina ke kusala masonga ve ikele ya Nzambi ve, ye yina ke kuzola mpangi na yandi ve. 11 Sambu ikele yai nsangu yina beno kuwaka tuka luyantiku, [na kuzaba] nde beno kuzolana mosi na ya nkaka, 12 ve bonso Kayini vandaka muntu ya mbi ye fwaka mpangi na yandi. Ye na kikuma ya inki yandi fwaka yandi? Sambu bisalu na yandi vandaka yam bi ye yina ya mpangi na yandi vandaka masonga.

13 Beno yituka ve, ba mpangi, kana insi—ntoto ke kuyekula beno. 14 Beto, beto kuzaba nde beto me lutaka katuka na lufwa na luzingu, sambu beto ke kuzolaka ba mpangi na beto; yina ke kuzola mpangi na yandi v eke kuzinga kati na lufwa. 15 Konso muntu yina ke kuyekula mpangi na yandi ikele mufwi bantu, ye beno kuzaba nde mufwi bantu mosi ve ikele na luzingu ya mvula na mvula na kuzingaka kati na yandi.

16 Na nzila ya yai beto zabaka zola, ikele Yandi bikaka luzingu na Yandi sambu na beto; ye beto, beto fetele kubika luzingu na beto sambu na ba mpangi. 17 Kansi yina ikele na bima ya insi—ntoto yai, ye ke kumona mpangi na yandi na mfunu, ye ke kukangila yandi ntima, inki mutindu zola ya Nzambi ke kuzinga kati na yandi ?

18 Bana, beto kuzola na ndinga ve ata na ludimi ve, kansi na kisalu ye na kieleka. 19 Ye na nzila ya yai beto ta kuzaba nde beto ikele ya kieleka, ye beto ta kusiamisa ba ntima na beto na ntwala na Yandi ; 20—nde, kana ntima na beto ke kuzengila beto nkanu, Nzambi ikele ya kuluta ba ntima na beto na nene ye Yandi kuzaba mambu yonso. 21 Ba zolama, kana ntima na beto ke kuzengila beto nkanu ve, beto ikele na kusiamisama na ntwala ya Nzambi; 22 ye konso kima yina beto ta kulomba, beto ke baka yo na Yandi, sambu beto ke zitisa ba lutumu na Yandi ye nde beto ke kusala mambu yina ke sepidisa Yandi. 23 —Ye ikele yai lutumu na Yandi, nde beto kukwikila na zina ya Mwana na Yandi Yezu Klistu ye nde beto kuzolana mosi na ya nkaka, mutindu Yandi pesaka beto lutumu; 24 ye yina ke kuzitisa ba lutumu na Yandi ke kuzinga kati na Yandi, ye Yandi kati na muntu yina; ye na nzila ya yai beto kuzaba nde Yandi ke kuzinga kati na beto, [kuzaba] na nzila ya Mpeve yina Yandi pesaka beto.

         Ba zolama, beno kwikila ve ba mpeve yonso, kansi beno meka ba mpeve [sambu na kuzaba] kana bo ikele ya Nzambi, sambu ba mbikudi mingi ya luvunu me basika na insi—ntoto. 2 Na nzila ya yai beto kuzaba Mpeve ya Nzambi : mpeve yonso ke kutuba Yezu Klistu kwisaka na nsuni ikele ya Nzambi, 3 ye mpeve yonso yina ke kutuba ve Yezu Klistu kwisaka na nsuni ikele ya Nzambi ve ; ye yai ikele [mpeve] ya ntedimini Klistu, yina beno kuwaka nde yandi ke kwisa, ntete ti ntangu yai yandi ikele na insi—ntoto. 4 Sambu na beno, bana, beno ikele ya Nzambi, ye beno me nungaka yandi, sambu yina ikele kati na beno ikele ya kuluta nene yina ikele na insi—ntoto. 5 Sambu na bo, bo ikele ya insi—ntoto ; yo yina bo ke kutuba na mpila ye na ba ngindu ya insi—ntoto, ye insi—ntoto ke kuwa bo. 6 Beto, beto ikele ya Nzambi ; yina kuzaba Nzambi ke kuwa beto ; yina ikele ya Nzambi ve ke kuwa beto ve : Na yina beto kuzaba mpeve ya kieleka ye mpeve ya luvunu.

7 Ba zolama, beto zolana mosi na ya nkaka, sambu zola ikele ya Nzambi, konso muntu yina ke kuzola me kubutuka na Nzambi ye kuzaba Nzambi, 8 yina ke zolaka ve me kuzaba Nzambi ve, sambu Nzambi ikele zola. 9 Na yai monisamaka zola ya Nzambi sambu na beto, ikele nde Nzambi tindaka Mwana na yandi mosi kaka na insi—ntoto, na mpila nde beto kuzinga na nzila na Yandi; 10 na yai ikele zola, ikele ve na yina beto, beto zolaka Nzambi, kansi na yina Yandi zolaka beto ye tindaka Mwana na Yandi [sambu na kuvanda] mufiki ya masumu na beto.

11 Ba zolama, kana Nzambi me zolaka beto mutindu yina, beto mpi beto fetele kuzolana mosi na ya nkaka. 12 Muntu mosi ve me monaka Nzambi ; kana beto ke kuzolana mosi na ya nkaka, Nzambi ke kuzinga kati na beto, ye zola na Yandi me lungisama kati na beto. 13 Na nzila ya yai beto kuzaba nde beto ke kuzinga kati na Yandi ye Yandi kati na beto, ikele nde Yandi pesaka beto Mpeve na Yandi ; 14 ye beto, beto monaka ye beto ke kuta kimbangi nde Tata tindaka Mwana [sambu na kuvanda] Ngulusi ya insi—ntoto.

15 Konso muntu yina ta kutuba nde Yezu ikele Mwana ya Nzambi, Nzambi ke kuzinga kati na yandi ye yandi kati na Nzambi. 16 Ye beto bakisaka ye beto kwikilaka zola yina Nzambi ikele na yo na beto. Nzambi ikele zola, ye yina ke kuzinga kati na zola, ke kuzinga kati na Nzambi ye Nzambi kati na yandi. 17 Na yai me kulungisama zola ti beto, na mpila nde beto kuvanda na kutula ntima yonso na kilumbu ya kusambisama, ikele nde, bonso Yandi ikele, Yandi, beto ikele, beto mpi, na kati ya insi—ntoto yai. 18 Boma ikele kati na zola ve, kansi zola ke kula boma, boma ke nata ti yo kuyangisama ; ye yina ke kuwa boma ke kulungisama ve na kati ya zola. 19 Beto beto ke zolaka Yandi sambu Yandi zolaka beto ya ntete.

20 Kana muntu kutuba : Mono ke zolaka Nzambi, ye ke kumenga mpangi na yandi, yandi ikele muntu ya luvunu; sambu yina ke kuzola mpangi na yandi ve ya yandi ke kumona, inki mutindu yandi lenda zola Nzambi yina yandi ke monaka ve? 21 Ye beto ikele na lutumu yai ya me katuka na Yandi, nde yina kuzola Nzambi, kuzola mpi mpangi na yandi.

         Konso muntu yina ke kwikila nde Yezu ikele Klistu, me butuka na Nzambi; ye konso muntu yina ke zola yina butaka, ke zola mpi yina me butuka na Yandi. 2 Na nzila yai beto ke kuzaba nde beto ke kuzola bana ya Nzambi, ikele ntangu beto ke kuzola Nzambi ye nde beto ke zitisa ba lutumu na Yandi ; 3 sambu yai ikele zola ya Nzambi, nde beto kuzitisa ba lutumu na Yandi, ye ba lutumu na Yandi ke pesaka mpasi ve, 4 sambu nde yonso yina me butuka na Nzambi ikele munungi ya insi—ntoto ; ye ikele yai lunungu yina nungaka insi—ntoto [kuzaba] lukwikilu na beto. 5 Nani yina ikele munungi insi—ntoto, kana ve yina ke kwikila nde Yezu ikele Mwana ya Nzambi?

6 Ikele Yandi yina kwisaka na nzila ya masa ye na nzila ya menga, Yezu, Yandi, Klistu, kaka ve na [ngolo ya] masa, kansi na [ngolo ya] masa ye ya menga ; ye ikele Mpeve yina ke kuta kimbangi, sambu Mpeve ikele kieleka ; 7 sambu yo ikele tatu yina ke kuta kimbangi : 8 Mpeve, ye masa, ye menga, ye bo tatu ikele na ngwakana sambu na [kimbangi] mosi. 9 Kana beto ke kuyamba kimbangi ya bantu, kimbangi ya Nzambi ikele ya kuluta nene ; sambu yai ikele kimbangi ya Nzambi yina yandi kutaka na yina me kutala Mwana na Yandi. 10 Yina ke kwikila na Mwana ya Nzambi, yandi ikele na kimbangi kati na yandi mosi; yina ke kwikila na Nzambi ve, me kumisa Yandi muntu ya luvunu, sambu yandi kwikilaka ve na kimbangi yina Nzambi kutaka na yina me kutala Mwana na Yandi. 11 Ye yai ikele kimbangi: Nde Nzambi pesaka beto luzingu ya mvula na mvula, ye luzingu yai ikele kati na Mwana na Yandi : 12 Yina ikele na Mwana ikele na luzingu, yina ikele na Mwana ya Nzambi ve ikele na luzingu ve.

13 Mono sonikilaka beno mambu yia na mpila nde beno kuzaba nde beno ikele na luzingu ya mvula na mvula, beno yina ke kwikila na zina ya Mwana ya Nzambi.

14 Ye yai ikele kutula ntima yina beto ikele na yo kati na Yandi, nde kana beto kulomba kima mosi na mpila ya luzolo na Yandi, Yandi ke kuwa beto; 15 ye kana beto kuzaba nde Yandi ke kuwa beto, konso kima yina beto ke kulomba, beto kuzaba nde beto ikele ne bima yina beto lombaka na Yandi.

16 Kana muntu mosi kumona mpangi na yandi kusumuka na disumu yina ikele ve ya lufwa, yandi ta kulomba [sambu na yandi] ye Yandi ta kupesa yandi luzingu, [kuzaba] na ba yina ke kusumuka ve na lufwa. Ikele na disumu ya lufwa : Sambu na disumu yina, mono me kutuba ve nde yandi kulomba. 17 Mbi yonso ikele disumu, ye ikele na disumu yina ikele na lufwa ve. 18 Beto kuzaba nde konso muntu yina me butuka na Nzambi ke kusumuka ve, kansi yina me butuka na Nzambi ke kudikeba yandi mosi ye muntu ya mbi ke kusimba yandi ve. 19 Beto kuzaba nde beto ikele ya Nzambi ye nde insi—ntoto ya mvimba ikele kati na muntu ya mbi. 20 Beto kuzaba nde Mwana ya Nzambi me kwisaka, ye Yandi pesaka beto mayele na mpila nde beto kuzaba yina ya Kieleka, ye beto ikele kati na yina ya Kieleka, [kuzabaka] kati na Mwana na Yandi Yezu Klistu : Yandi ikele Nzambi ya kieleka ye luzingu ya mvula na mvula.

21 Bana beno kudikeba na biteki.