À revoir : 14 notes

 

MUKANDA YA YUDA

 

1 Yuda, mpika ya Yezu Klistu ye mpangi ya Yakobi, mono me sonikila beno ba bingami, ba zolama kati na Nzambi Tata, ye ba yina me kebama kati[1] na Yezu Klistu : 2 Nde mawa, ye ngemba, ye zola kuyikamina beno !

3 Ba zolama, ntangu mono vandaka kusala nswalu kibeni sambu[2] na kusonikila beno luguluku yina ikele ya beto yonso, mono kudimonaka na mfunu ya kusonikila beno na mpila nde mono kupesa beno kikesa ya kunwana sambu na lukwikilu yina longamaka mbala mosi na ba santu ; 4 sambu bantu mosi kudikotisaka na kinsweki [kati na ba nkwikisi], bo me sonamaka ntama na ntwala sambu na kusambisama[3] yai, bantu ya mbi yina ke kusobaka dienga ya Nzambi na beto na ntambudidi ya mvindu[4], ye yina ke kubuya Kiyadi na beto kaka mosi ye Mfumu[5] Yezu Klistu.

5 Mono ke zola kuyibuka beno, na beno yina mbala mosi zabaka mambu yonso, nde Mfumu, ya Yandi kangulaka nkangu [na Yandi] na mbanza ya Ezipito, na nima Yandi bebisaka ba yina kwikilaka ve ; 6 —ye nde Yandi bumbaka na miniololo ya mvula na mvula, na mudidi, sambu na kusambisama ya kilumbu ya nene, ba wanzio yina kebaka ve kisina na bo, kansi ba yina bikaka kifulu na bo ya kuzinga ; 7 bonso Sodomi ye Gomola[6], ye ba mbanza ya nziunga, ya bo kudibikaka na pite mutindu mosi ba yina, ye na kwendaka na nima ya nsuni ya nkaka, bo ikele pana bonso mbandu na kubakaka ndola ya tiya ya mvula na mvula. 8 Na mutindu mosi, ba loti ndosi yai ke kumisaka nsuni mvindu, ye ke kuvwenza bimfumu, ye ke kufinga ba nkembo. 9 Kansi Mikaeli mbuta ya ba wanzio, ntangu, na kunwaninaka ti diabulu, yandi vandaka kutula ntembe [ti yandi] na yina me kutala nitu ya Mose, zengilaka yandi ve ndola na mafingu ; kansi yandi tubaka : Bika nde *Mfumu kulola nge ! 10 Kansi ba yai ke vwenzaka yina yonso bo me zaba ve, ye bo ke kudibebisa[7] na yina yonso bo ke kubakisa na kimuntu yonso[8] bonso bibulu ya kukonda mayele. 11 Mawa na bo, sambu bo tambulaka na nzila ya Kayini[9], ye bo kudibikaka na kifu ya Balama[10] sambu na lufutu, ye bo bebaka na ntedimini ya Kola[11]. 12 Ba yai, bo ikele matono[12] na ba madia na beno ya zola, na kusalaka ba nkinsi ti beno ya konda boma, na kudifulusaka bo mosi : Matuti ya kukonda masa, ya kunatama na mipepe ; ba nti ya ke butaka mbuma ve na nsungi ya mbuma, ya kufwa mbala zole, ya kutumunama ; 13 bitembo ya nganzi ya nzadi mungwa, na kulosaka mafulufulu ya mambu na bo ya nsoni, ba mbwetete ya ke kutambula—mbula, na ba yina mpipa ya mudidi me kuyilamina bo kimakulu. 14 Enoki mpi, muntu ya nsambwadi yantika Adami, bikulaka sambu na ba yai, na kutubaka : Tala, Mfumu me kwisa na kati[13] ya mafunda kumi ya ba santu na yandi, 15 sambu na kubwisa ndola na bantu yonso, ye sambu na kundimisa bantu yonso ya mbi kati na bo bisalu na bo yonso ya mbi yina bo salaka na mbi yonso ye ba [ndinga] yonso ya ngolo yina ba nsumuki ya mbi tubilaka yandi. 16 Ba yai, ikele bantu ya kubokuta—bokuta, na kubokutaka na yina me kukumina bo, na kutambulaka na mpila ya kulula ya mbi na bo mosi (ntangu minoko na bo ke kutuba ba ndinga ya lulendo), ye na kulebaka bantu sambu na munluta [na bo mosi].

17 Kansi beno, ba zolama, beno yibuka ba ndinga yina tubamaka na ntwala na nzila ya ba ntumwa ya Mfumu na beto Yezu Klistu, 18 inki mutindu bo vandaka kutubila beno nde na nsuka ya ntangu, ta kuvanda ba seki na kutambulaka na mpila ya kulula ya mbi ya bo mosi, 19 ba yai ikele ba yina ke kuditulaka na kingenga [bo mosi], bantu ya ke twadisama na kimuntu[14], na kukondaka Mpeve. 20 Kansi beno ba zolama, na kuditungaka beno mosi na lukwikilu na beno ya kuluta santu, na kusambaka na nzila ya Mpeve Santu, 21 beno kudibumba kati na zola ya Nzambi, na kukingaka mawa ya Mfumu na beto Yezu Klistu sambu na luzingu ya mvula na mvula, 22 ye ba mosi yina ke kutedimina, nganina bo ; 23 ba nkaka gulusa bo ti boma, na kukatulaka bo na nganda ya tiya, na kumengaka ata lele ya me kuma mvindu na nzila ya nsuni.

24 Na yina ikele na kiyeka ya kukeba beno na kukonda kubula dibaku ye na kutula beno na kukonda kifu na ntwala ya nkembo na Yandi ti kufuluka ya kiese, 25 —na Nzambi mosi kaka, Ngulusi na beto, na nzila ya Mfumu na beto Yezu Klistu, nkembo, lukumu, ngolo ye kiyeka, tuka ntwala ya mvu yonso, ye ntangu yai, ye sambu na ba mvu yonso ! Amen.