Obadia

 

 

1. Emoniseli ya Obadia. -Boye alobi Nkolo Yawe po na Edome. Toyoki sango kowuta epayi ya Yawe, pe motindami moko atindami kati na bikolo: botɛlɛma! Pe totelemela ye pona etumba. 2. Tala, nakomisi yo moke na kati ya bikolo; pe otiolami mingi. 3. Lolendo ya motema na yo epengwisi yo, yo oyo ofandi na mabulu ya mabanga, esika na yo ezali ya likolo; yo oyo olobi na motema na yo: Nani akokitisa ngai na mabele? 4. Soki okopumbwa lokola mpongo pe kati na minzoto otie zala na yo, nakokitisa yo wuta kuna, elobi Yawe. 5. Soki miyibi, soki babotoli ya butu baye epayi na yo (lolenge obebi na likama!) bakoyiba mingi koleka oyo ekoki pona bango? Soki baoyo bakataka bambuma ya vino baye epayi na yo, bakotika maboke ya bambuma ya vino te? 6. Ndenge nini baluki-luki Esau! ndenge nini biloko na ye oyo ebombami ebimi na pole!

7. Batu ya boyokani na yo babengani yo kino na mondelo ya mboka; batu ya kimia na yo bakosi yo, balongi yo; na lipa na yo batieli yo lokola motambo na se na yo. Mayele ezali te kati na ye! 8. Ezali na mokolo wana te, elobi Yawe, nakobebisa na kati ya Edome batu ya bwania, pe mayele na ngomba ya Esau? 9. Pe bilombe na yo ya makasi, O Temane, bakolenga na somo, ete moko na moko alongwa na ngomba ya Esau na nzela ya kobomama. 10. Na tina ya mobulu ya yawuli osalaki  ndeko na yo Yakobo, soni ekozipa yo, pe okobomama pona libela. 11. Na mokolo oyo otelemaki wana na ngambo mosusu, na mokolo oyo bapaya bamemaki bomengo na ye, pe tango batu ya libanda bakotaki na bikuke na ye pe babetaki zeke likolo ya Yerusaleme, yo pe ozalaki lokola moko na bango. 12. Kasi osengelaki te kotala mokolo ya ndeko na yo, mokolo ya likama na ye; pe olingaki te kosepela likolo ya bana ya Yuda na mukolo ya kobebisama na bango, pe olingaki te kofungola monoko na yo monene na mukolo ya pasi. 13. Osengelaki te kokota na ekuke ya bato na ngai na mukolo ya minioko na bango; pe kotalaka pasi na ye na mukolo ya kobebisama na ye te; pe osengelaki te kotiya loboko na yo likolo ya bomengo na ye na mukolo ya pasi na ye; 14. Pe osengelaki te kotelema na esika ya bokutani pona koboma baoyo ya ye oyo bakimaki liwa, pe osengelaki te okaba baoyo ya ye oyo batikalaki na mukolo ya pasi.

15. Po mukolo ya Yawe ekomi pene likolo na bikolo nionso. Lolenge osalaki ekosalamela yo ; misala na yo ekokweya na moto na yo. 16. Pamba te lokola bomelaki na ngomba na ngai ya bule, ndenge moko nde bikolo nionso bakomela tango nionso; pe bakomela, pe bakokitisa na mongongo, pe bakozala lokola nde bazalaki te. 17. Pe likolo na ngomba ya Siona ekozala na bakangolami; pe ekozala mosantu, pe ndaku ya Yakobo bakozwa lisusu biloko na bango. 18. Ndaku ya Yakobo ekozala moto, pe ndaku ya Yozefe ekozala lolemo ya moto; pe ndaku ya Esau ekozala matiti; pe bakotumba bango pe bakosilisa bango; pe mutu te akotikala na ndaku ya Esau, po Yawe nde alobi. 19. Baoyo ya sudi bakozwa ngomba ya Esau, pe baoyo ya mabele ya se ya lubwaku, Bafilistia; pe bana ya Israele bakozwa mboka ya Efrayime pe mboka ya Samaria; pe Binyamini ‘’akozua’’ ya Galade. " 20. Pe batu ya Israel oyo bazalaki na bowumbu, basoda oyo bakozua oyo ezalaki ya Bakanana kino na Sarepta, pe baoyo ya Yerusaleme oyo bazalaki na bowumbu na Sefarad bakozua bingumba ya sudi. 21. Babikisi bakomata na Ngomba Siona pona kosambisa Ngomba ya Esau. Pe bokonzi ekozala na Yawe.