1 Mokapo 1

1. Liloba na Yawe na Yona, mwana ya Amitayi, alobi ; 2. Telema, kende na Ninive engumba munene, pe ganga likolo na yango, pamba te mabe na bango emati liboso na ngai.

3. Yona atelemi pona kokima na Tarsish, mosika na elongi na Yawe pe akitaki na Yafo pe amonaki masuwa ezokende na Tarsish; pe apesaki mbongo pona esika na ye, akiti na kati pona kokende na bango na Tarsish, mosika na elongi na Yawe. 4. Pe Yawe atindi mopepe ya makasi likolo ya mayi monene pe masuwa ezalaki kobanga epasuka. 5. Batu ya masuwa babangaki pe moko na moko abelelaki epayi ya nzambe na ye, bongo babwaki na mayi biloko nionso kati na masuwa pona kolongola kilo nionso. Pe Yona akitaki na se ya masuwa pe alalaki na pongi makasi. 6. Mokambi ya basali na masuwa ayaki epayi na ye, pe alobi na ye : ozosala nini molali ? Lamuka, belela Nzambe na yo, mbala mosusu Nzambe akokanisa biso, pe tokokufa te.

7. Pe balobanaki bango na bango : Boya, tobwaka bazeke pona koyeba na tina ya nani mpasi oyo ezali kokomela biso. Pe babwaki bazeke, pe zeke ekweyaki likolo ya Yona, 8. Balobi na ye : yebisa biso pona na nani mpasi oyo ekomeli biso ? Osalaka nini ? Owuti wapi ? Mboka na yo nini ? pe batu ya mboka na yo banani ? 9. Pe alobi na bango : nazali Ebre pe ngai nabangaka Yawe Nzambe ya likolo, oyo asala mayi monene pe mabele. 10. Pe mibali yango babangaki makasi, pe balobi naye : osali nini kuna? Pamba te batu yango bayebaki ete azokima liboso ya elongi na Yawe, po ye ayebisaki bango yango. 11. Pe balobaki na ye : tokosala yo nini po ete mayi monene ekita liboso na biso ? pamba te mayi monene ezalaki komata se komata 12. Alobaki na bango ete : bokamata ngai, pe bobwaka ngai na mayi monene, pe mayi monene ekokita pona bino ; po nayebi ezali na tina na ngai nde mopepe monene eyaki likolo na bino.13. Bongo mibali basalaki makasi pona kozongisa yango na mabele, pe bakoki kosala yango te, po mayi monene na mopepe makasi ebandaki komata kaka, pona bango. 14. Pe babelaki Yawe pe balobi : A Yawe, tokufa te na tina ya bomoyi ya mutu oyo, tobondeli yo, kotia te likolo na biso, makila ya mutu oyo moyengebeni, po yo Yawe osali oyo olingi. 15. Pe bazwaki Yona pe babwaki ye na mayi monene, pe kanda ya mayi esili. 16. Pe mibali babangi Yawe mingi, pe babonzaki libonza moko na Yawe pe basalaki bilaka.

2 Mokapo 2

1. Pe Yawe abongisi mbisi moko ya monene po na komela Yona ; pe Yona atikalaki na libumu ya mbisi mikolo misatu na butu misatu. 2. Pe Yona abondelaki Yawe Nzambe na ye wuta na libumu ya mbisi, 3. Pe alobi :

Nabelelaki Yawe na kati ya bozindo ya pasi na ngai, pe ayanolaki ngai. Na kati ya sheol, nagangaki, oyokaki mongongo na ngai.

4. Obwakaki ngai na kati ya bozindo, na kati ya mozindo ya mayi monene, pe mbonge ya mayi monene ezingaki ngai ; mipepe na ye nionso, pe bambonge na yo nionso eleki likolo na ngai.

5. Pe ngai nalobaki : Nabengami mosika na liboso ya misu na yo : nzokande nakotala lisusu epai na tempelo ya bosantu na yo.

6. Bamayi ezingaki ngai tï na molimo penza, bozindo ezingaki ngai, bamatiti ya ebale ezinaki ngai moto.

7. Nakitaki tï na se ya bangomba, bikangelo ya mabele ekangamaki likolo na ngai libela ; bongo Ô Yawe Nzambe na ngai, obimisi bomoyi na ngai na libulu.

8. Tangu molimo na ngai elembaki kati na ngai, nakanisaki Yawe, pe losambo na ngai ekomaki epayi na yo na tempelo ya bosantu na yo.

9. Baoyo batalaka bikeko ya pamba, batikaka ngolu oyo ezali na bango.

10. Kasi ngai, nakobonzela yo na mungongo ya masanzoli ; nakokokisa oyo nalapaki. Lobiko ezali epayi na Yawe.

11. Pe Yawe apesaki motindo na mbisi, pe asanzi Yona na mokili.

3 Mokapo 3

1. Pe liloba na Yawe eyaki epayi na Yona pona mbala ya mibale : 2. Telema, kende na Ninive, engumba monene, pe sakola bango ndenge nakolakisa yo.

3. Pe Yona atelemaki pe akeyi na Ninive, na ndenge ya liloba ya Yawe. Nzokande Ninive ezalaki engumba monene makasi, na mikolo misatu na nzela. 4. Pe Yona abandaki kokota na kati ya engumba, na nzela ya mokolo moko pe agangaki, pe alobi : Mikolo tuku mineyi lisusu, pe Ninive ekobukana.

5. pe bafandi ya Ninive bandimaki Nzambe, pe bazwaki mokano ya kokila bileyi, pe balataki bilamba ya saki, kobanda na mikolo na bango tï na bana ya mike makasi. 6. Bongo liloba ekomaki epayi ya mokonzi ya Ninive, pe atelemaki na kiti ya bokonzi na ye, pe alongolaki elamba na ye ya bokonzi pe alataki saki kutu pe avandi na putulu. 7. Pe asakolaki pe alobi na kati ya Ninive na etinda ya mokonzi, pe ya batu na ye lokumu, koloba : tika ete batu pe baniama, ya minene pe ya mike ya bampate, baliya eloko te, bakoleyisa te, pe bakomela mayi te. 8. Batu pe baniama bakolata basaki. Pe bakoganga na mongongo makasi epayi ya Nzambe ; pe moko na moko alongwa na banzela na ye ya mabe pe na bozangi bosembo oyo ezali na maboko na bango 9. Nani ayebi ? Nzambe akozonga pe akobongwana, pe akotika kanda na ye ya makasi, pe biso tokokufa te. 10. Pe Nzambe amoni misala na bango, ete batikaki nzela na bango ya mabe ; pe Nzambe abongwanaki na mabe oyo alobaki po ya kosala bango, pe asalaki yango te.

4 Mokapo 4

1. Bongo nionso emonanaki mabe makasi pona Yona makasi pe asilikaki. 2. Pe abondelaki Yawe, pe alobi : Yawe nabondeli yo, yango ezalaki liloba na ngai te tangu nazalaki nanu na mboka na ngai ? Yango nalingaki kokima na ngai na Tarsish ; po nayebaki ete ozali Nzambe oyo asalaka ngolu pe ozali mawa, malembe na kanda pe monene boboto pe oyo ayokaka kosala mabe. 3. Pe sik’oyo, Ee Yawe, nasengi na yo olongola bomoyi na ngai, po eleki malamu ete nakufa koleka ete nazala na bomoyi. 4. Pe Yawe alobi : okosala malamu na kosilika ?

5. Pe Yona abimaki na engumba pe afandaki na esti ya engumba ; pe amisalelaki hema kuna ; pe afandaki na se ya elilingi pona komona oyo ekokomela engumba. 6. Pe Yawe Nzambe abongisaki nzete kikayon, pe akolisaki yango likolo na Yona pona elili ezala likolo ya moto na ye, pona kokangola ye na pasi na ye, pe Yona asepeli na esengo makasi na tina ya nzete kikayon 7. Pe lobi Nzambe abongisaki motiopi na tongo makasi, atobolaki nzete kikayon, pe ekawuki. 8. Pe ekomaki ete tangu moyi ebimaki, Nzambe abongisaki mopepe makasi ya esti ; pe moyi ebetaki Yona na moto pe akweyaki na kolemba pe asengaki liwa pona bomoyi na ye, pe alobaki : ezali malamu nakufa koleka ete nazala na bomoyi. 9. Pe Nzambe alobi na Yona : ezali malamu ete osilika na tina ya nzete kikayon ? pe alobi : ezali malamu pona ngai nasilika kino na liwa. 10. Pe Yawe alobi : ozali na mawa pona nzete kikayon, oyo osali ata mosala makasi te pe olonaki te, oyo ebimaki na butu moko, pe ekufaki na butu moko; 11. Pe ngai, nasengeli te koyokela Ninive mawa, engumba monene, oyo kati na yango ezali na batu koleka nkoto kama na tuku mibale, oyo bayebi bokeseni kati na loboko na bango ya mobali pe ya mwasi, pe ebele ya bibwele.