2 KORETO

 

Chapitres

 1   2  -   2   3  -   3   3  -   4   4  -   5   5  -   6   6  -   7   7  -   8   8  -   9   9  -   10   9  -   11   10  -   12   11  -   13   12  -

 

2 KORETO 1

1Paulu, utumami a Kristu Jesu uma lu lulangu la Unyashungu, la unyasu Timote.

Le Ekelizia ka Unyashungu keli la Koreto,1:1 Etsh. 18:1. ndu le ekilami tshe weli lʼAkaya tshe:

2Ngandji ka mamba kayali la nyu, ndu ki kʼuma le Unyashungu Shesu, la uma le Khumadiondjo Jesu Kristu!

 

3Lutumbu layali le Unyashungu Shi Khumesu Jesu Kristu, Shesu ka ketshi, Unyashungu wʼekikitshelu tshe; 4latutukikitshaka lu asui tshe, dia shu mbeya nkikitsha akina lu asui awo lʼekikitshelu kakatukikitsha Unyashungu. 5Ne dia uku atutuyalaka la asui efula le Kristu, mbatutuyalaka la ekikitshelu efula uma le Kristu. 6Naka shu tambusuyama, oso eli ne dia ekikitshelu kanyu la panda kanyu. Naka shu tambukikitshama, oso eli ne dia ekikitshelu kanyu, katutungaka shikikelu ka eteti lʼasui watusuyawo. 7Elungamelu kasu le nyu kambushikikala, ne dia shu mbeyaka shati: Uku ambunyusuyama la su, okone nyambukikitshama la su.

8Anyasu, shu nangaka nyu mbeya dikambu diʼasui wakatundi lʼAsiya,1:8 1 Kor. 15:32. la wutshu wutamanya, wuleki wulu asu, wakatukutute; ku takakani shati: Tayuvo. 9Keli shu taki la manyema ka nyoi lʼatei asu, diaha shu ndjalungamela, keli dia shu nungamela Unyashungu, latululaka wakavu. 10Ndi lakatutshungula uma lu nyoi keku ka wuki, ayututshungulaka. Shu tambulungamela shati: Ndi ayututshungula ndu kakiane. 11Ndu nyu nyambutukimanyia la dombelo dianyu, ne dia antu efula watukeli Unyashungu luaka, ne dia ushasha wakatusha antu efula.

 

12Shu tambuyatumbula lu dikambu ne; ndu khumʼutema keli omenyi asu ati: Shu takakendakenda lʼatei a wa la kete, djekaleka lʼatei anyu, lu ekila la mete ka Unyashungu; aha lu yimba yʼantu, keli lu ngandji ka mamba ka Unyashungu. 13Shu hatunyufundela akambu akina, paka akambu walanyu la weyanyu. Dimi lambulungamela nti: Nyu nyayuwaeya edja ndu lʼekumelu, 14uku akanyateyi etenyi nyati: Shu teli lutumbu lanyu, la nyu nyeko lutumbu lasu, lu lushi la Khumesu Jesu.

 

15Ne dia elungamelu kene, mbakamasanguya ndja le nyu la ntundu, ne dia nyu ndjala la ongenongeno ukina. 16Dimi lakalangi mbeta le nyu utsha la Makedoniya,1:16 Etsh. 19:21. la uma la Makedoniya ku nkalula le nyu ntu, ku nyu ndekiyami lu lokendo lami utsha la Judiya. 17Lamʼakamasanguya osoku, dimi laki la uhakuhaku uka? Akambu wakamasanguya ntsha, lakasanguya uku lu akambu wa dimba, dia dimi mvuta nti: Elu, la Kema, lu etena otoi? 18Keli uku eli Unyashungu la kolamelu, diui diasu le nyu kundjala Elu la Kema. 19Ne dia Jesu Kristu, Onʼa Unyashungu, lakatanyusambisha, ndu dimi ndu Silivano ndu Timote,1:19 Etsh. 18:5. ndi taki Elu la Kema; le ndi ndjalaka Elu nshi tshe. 20Ne dia alaka tshe wa Unyashungu watutanaka Elu kawo le ndi. Okone ndu Ayali Osoku ndjalaka le ndi, dia Unyashungu ntumbwama. 21Unyashungu ambutushikike kame la nyu le Kristu, ambutukita iso. 22Ndi ambutudja djimbitelu, ambutusha Nyuma okole lʼetema asu.

 

23Keli dimi lambeta Unyashungu uku omenyi lu lumu lami nti: Dimi lakaseke ndja la Koreto, ne dia latukuyunyuhangwela. 24Shu hatahamela mbetawo kanyu, keli teko ekimanyidi wʼongenongeno anyu, ne dia nyu nyambushikikala lu mbetawo kanyu.

2 KORETO 2

1Dimi lakasanguya dikambu ne nti: Handjuya le nyu ntu la lunyangu. 2Naka dimi lambunyunyangia, untu akona ayongenyangenya, naka aha one lakamanyangisha? 3Dimi lakafundi dikambu so, ne dia dimi hayala la lunyangu uma le wane weli la dikambu dia ngenyangenyami lamʼayumuya. Dimi lakanyulungamela, nyu tshe, nti: Ongenongeno ani eko ongenongeno anyu, nyu tshe. 4Ne dia uma lʼokei efula la ulingulingu lʼutema, mbakamanyufundela mukanda la asoi efula lu ashu. Aha ne dia nyunyangia, keli dia nyu mbeya ngandji kami kʼutamanya le nyu.

 

5Keli naka untu ambutunga lunyangu, ndi hanyangia dimʼutu, keli lu wuhu omotshi — aha dia ntekoya nyunyangia — ndu le nyu tshe. 6Asui andi ane wakanyusuya nyu wane wakaleki efula, wakakuki. 7Okone ololo nyu mbudimanyia kolo yandi la mbukikitsha, ndi atukolembiama la lunyangu landi utamanya. 8Okone dimi lambunyosengasenga nti: Nyushikike ngandji kanyu le ndi. 9Ndu dia dikambu ne mbafundami dia dimi nyuhimba, kana nyu nyeko la ukitanyia lu akambu tshe. 10Keli lamʼayunyudimanyia untu kolo yandi, ndu dimi layudimanyia akambu wakamudimanyia. Dimi lakudimanyia lu ashu a Kristu dikambu dianyu, 11ne dia Satana atukutuleka wulu: shu mbeyaka ditshelu diandi.

12Lamʼakamakumi la Toroa dia lukumu lʼololo la Kristu, lamʼakawandjihwela lukuki le Khumadiondjo, 13utema ami kundjala la ki, ne dia dimi kuntana Tito onalingu. Okone lakawasha moyo, ku lakatshu la Makedoniya.2:13 Etsh. 20:1.

14Keli Unyashungu, latutolombolaka nshi tshe lʼelekelu kʼakambu le Kristu, ndu latudianganyaka upumu wʼololo andi lu ahuli tshe uma le su, atumbwami! 15Ne dia shu teko upumu wʼololo wa Kristu le Unyashungu, le waku wambushimbamela, ndu le waku wambushisho. 16Le omotshi teli upumu wʼuma lu nyoi utsha lu nyoi; le akina teko upumu wʼuma lu lumu utsha lu lumu. Akona ambukuka lu akambu ane? 17Ne dia shu kema uku antu efula, wane watulanyaka diui dia Unyashungu, keli shu teko uku antu wa mete, uku wane wakatumama uma le Unyashungu, la lu ashu a Unyashungu, mbatutoteketaka le Kristu.

2 KORETO 3

1Shu tambutatela ndieyanya ntu uka? Kana shu la uhumba wa mikanda wa ndjenyanya le nyu, kana uma le nyu, uku atutshaka antu amotshi? 2Nyu nyame nyeko mukanda asu wa ndjenyanya, wa-mbufundama lʼetema anyu, dia mbeyama la mbalema le antu tshe. 3Nyu nyambenama nyati: Nyu nyeli mukanda wa Kristu wakatatumi, wahafundama lʼashi a mukanda, keli la Nyuma ka Unyashungu a lumu. Aha lu tuhasi tʼave,3:3 Etum. 24:12. keli luʼtahasi tʼetema wʼantu.3:3 Jer. 31:33; Ezek. 11:19; 36:26.

 

4Elungamelu keso keli la su le Unyashungu uma le Kristu. 5Shu shame hatukuki, dia shu nkana shati: Engo kambuya uma le su shame, keli ekukelu kasu keko uma le Unyashungu. 6Ndi akatuhilula dia shu nkuka uku ekambi wa sheki yʼuyuyu,3:6 Jer. 31:31. aha ekambi wa diui diufundami tu, keli ekambi wa Nyuma; ne dia diui tu diatutudiaka, keli Nyuma atutushaka lumu.

7Keli naka ekambelu ka nyoi kakafundama lʼaleta lu ave, kakayi kame la lutumbu, wuhu waki asi Isariyele kumbeya menda elundji ka Mose tee, ne dia lutumbu laki lʼelundji kandi,3:7 Etum. 34:29. lutumbu lako lakatakitakitaka. 8Okone ekambelu ka Nyuma haleki ndjala la lutumbu lutamanya uka? 9Ne dia naka ekambelu ka dianyelu keko la lutumbu, ku lutumbu lʼakambu wʼololo layuleka lutumbu loso. 10Mete, akambu wakayala la lutumbu ntundu, kema la lutumbu kakiane, ne dia lutumbu lone lambuleka lutumbu loso. 11Ne dia naka akambu wakakitakita waki la lutumbu, ku akambu wutshikadi wayuleka lutumbu efula.

 

12Ne dia elungamelu keku, mbesu la dihunga efula lamʼatelasu antu diui, 13aha uku Mose, lakakumbi dihondo diʼekumbamelu lʼelundji kandi,3:13 Etum. 34:33. dia asi Isariyele watukenda ekumelu kʼakambu wakakitakita. 14Keli tukanyi tawo takakikitala, ne dia edja ndu elo, lamʼalawo lu sheki yʼedjedja, dihondo diako diʼekumbamelu ntshikalaka diukumbami le wo edja ndu elo, ne dia dio diambunyema paka le Kristu. 15Keli edja ndu elo, tena tshe lamʼalawo mukanda a Mose, dihondo diʼekumbamelu ndjalaka lu tukanyi tawo. 16Keli lamʼambukadimo untu le Khumadiondjo, dihondo diako diatunyemaka. 17Khumadiondjo eli Nyuma. Lamʼeli Nyuma ka Khumadiondjo, ndjadjasela keko laawo. 18Keli shu tshe, lamʼendasu lutumbu la Khumadiondjo la dundji diahakumbami, uku lu lulindu, shu tambuhilwama lu efanelu kandi, uma lu edelu kemotshi utsha lu edelu kekina ka lu lutumbu, uma le Khumadiondjo leli Nyuma.

2 KORETO 4

1Okone, dia shu ndjala la ulimu one wʼuma lu ketshi ka Unyashungu, shu hatuheko. 2Keli shu tambutuna akambu wushami wa sonyi, shu hatutshi lu akambu wa doho, kana hatukesi antu la diui dia Unyashungu, keli tambushula akambu wa mete. Okone tambuyaenyanya le khumʼutema kʼuntu lʼuntu lu ashu a Unyashungu. 3Naka lukumu lʼololo lasu leli la dihondo diʼekumbamelu, lo lambukumbama paka le wane washisho. 4Etemolatemola ka la kete nye ambete waku wahetawo uku tutshungu lu tukanyi tawo, ne dia usasi a lukumu lʼololo la lutumbu la Kristu, leli efanelu ka Unyashungu tawahetelaki. 5Ne dia shu hatuyasambisha, keli shu tambusambisha Kristu Jesu uku Khumadiondjo, la shu shame uku ekambi anyu lu dikambu dia Jesu. 6Ne dia Unyashungu akati ati: Usasi wayoheta uma lu udjima,4:6 Etat. 1:3. vo wamboheta lʼetema asu, ne dia ntusha usasi wa mbeya lutumbu la Unyashungu lʼelundji ka Jesu.

7Keli shu teko la diango ne dia mumba lu dikitshelu dia kete, ne dia wuki a wulu utamanya ayali uma le Unyashungu, aha uma le su shame. 8Shu tabusuyama lu beke tshe, keli tatahinama; tambukanana, keli tataheko; 9tambusuyama, keli tatasekama; tambumbama la kete, keli tatadiakema. 10Nshi tshe, shu tatembaka djimbitelu va nyoi ka Jesu lu dimba, ne dia lumu la Jesu lenami lu alimba asu. 11Ne dia shu wane weli la lumu, tatukimomaka dia mvo lu dikambu dia Jesu, ne dia lumu la Jesu lenami lʼalimba asu wa nyoi. 12Okone nyoi ambukamba ulimu lʼatei asu, keli lumu lʼatei anyu.

13Keli shu teko la utema a mbetawo kame, uku diui diakafundama ati: Dimi laketawo, okone mbakamateketa,4:13 Esam. 116:10. ndu shu tambetawo, okone ndu shu tamboteketa; 14ne dia shu mbeyaka shati: One lakulula Khumadiondjo Jesu ayutulula ndu shu kame la Jesu, ayutemadia kame la nyu la ntundu kandi. 15Ne dia akambu tshe weko dikambu dianyu, ne dia ngandji ka mamba kafuli le antu wuleki efula, la eukelu ka lusaka afuli utsha lu lutumbu la Unyashungu.

16Okone shu hatuheko. Keli kuyanga dimba diasu diatuvokaka, utema asu atuyalaka uyuyu la lushi la lushi. 17Ne dia asui asu wa tshitshe wa kakiane wambutamanya ntutungela lutumbu la wuki pundju. 18Ne dia shu hatendi diango dienama, tatendaka diango diahenama, ne dia diango dienama dieko dia kakiane, keli diango diahenama dieli pundju.

2 KORETO 5

1Shu mbeyaka shati: Lamʼayuhandjo luudu la dimba diasu dia la kete, shu teko la luudu lʼuma le Unyashungu, luudu laki kumpikama lʼanya, lo leko pundju lʼulungu. 2Mete, lamʼekisu lu luudu lone, shu tatukhumaka akhumu, tambukumbula dia shu nkumbama la edjaselu kasu kʼuma lʼulungu. 3Lamʼayutolota osoku, shu hatutanema etakataka. 4Ne dia mete, shu ane weli lu luudu lone tatukhumaka akhumu ne dia wetshu, aha dia shu ndjala etakataka, keli dia shu ndotshama dia kene keli nyoi menama le kene keli lumu. 5One lakatolongosola dia dikambu ne eli Unyashungu, lakatusha okole a Nyuma.

6Okone shu tatuyalaka la dihunga nshi tshe. Shu tambeya shati: Lamʼekisu lʼalimba, shu kema laka Khumadiondjo, 7ne dia shu tatokendakendaka la mbetawo, aha la loseno. 8Okone shu teko la dihunga, tambuleka nanga mumo uma lu dimba, dia shu ndjala laka Khumadiondjo. 9Uma lu dikambu so, shu tatulangaka mbongenyangenya, kana shu teko la dimba, kana taha la dimba. 10Ne dia dieli la su, shu tshe, dia menama la ntundu kʼelumbwelu ka Kristu,5:10 Rom. 14:10. dia untu lʼuntu nungula akambu uku akandatshi lamʼakindi lu dimba, kana ololo kana kolo.

 

11Ne dia shu mbeyaka woma wa Khumadiondjo, shu tambetawuya antu, keli shu tambeyama le Unyashungu. Dimi lambulungamela nti: Tambeyama ndu le khumʼetema yanyu. 12Shu hatuyaeyanya le nyu ntu, keli shu tambunyutshikela dihuli dia nyu ndjatumbula lu dikambu diasu, ne dia nyu ndjala la wulu wa nkaluya diui le waku watuyatumbulaka lu ashu wʼantu, aha uma lʼetema. 13Naka shu tambudjo la yimba, dikambu so dieko dia Unyashungu. Naka shu la yimba yʼololo, dikambu so dieko dianyu. 14Ne dia ngandji ka Kristu atutosedingaka, ne dia shu mbetawoka shati: Otoi kakavwela tshe, okone tshe wakavu. 15Ndi akavwela tshe, ne dia waku weli la lumu, tawuyalaki la lumu dia dikambu diawo vame, keli dia one lakavwela, lakulwama dikambu diawo.

 

16Okone umaka kakiane, shu hateyi untu lu wuhu wa dimba, uku akateji Kristu lu wuhu wa dimba, shu hatuweyi osoku ntu. 17Okone naka untu eko le Kristu, ndi ambuyala etungamelu kʼuyuyu. Akambu wʼedjedja wambetaka, enda, akambu tshe wambuyala eyuyu. 18Keli akambu tshe weli uma le Unyashungu, lakayaekesanyia la su ndame uma le Kristu, ndu lakatusha ekambelu kʼekesanelu; 19ati: Unyashungu aki le Kristu dia mbekesanyia wa la kete la ndi, aha mbalela ediakelu kawo kʼelembe, keli akatukitshiya diui diʼekesanelu. 20Okone shu teko akendji wa Kristu, uku akanyosengasenga Unyashungu lʼenyo asu. Shu tambunyosengasenga dia dikambu dia Kristu shati: Nyekesaneli la Unyashungu. 21One laki kumbeya akambu wa kolo, Unyashungu akawete uku ulambu wʼakambu wa kolo dia dikambu diasu; ne dia shu ndjala uku ololo a Unyashungu lʼutema andi.

2 KORETO 6

1Shu tatukambaka kame la Unyashungu, tambunyosengasenga shati: Tanyulungulaki ngandji ka mamba ka Unyashungu anyanya; 2ne dia ndi akati ati:

Lʼetena kʼololo, dimi lakakuhukama;

Lu lushi la panda,6:2 Is. 49:8. dimi lakakukimanyia.

Ulungi, kakiane eko etena kʼololo; enda, kakiane eko lushi la panda. 3Tukitshiyaki untu utamba a ntakanya nduku yema, ne dia ekambelu kasu katukonywama. 4Keli lu akambu tshe, shu tatuyaenyaka uku ekambi wa Unyashungu: lu ekikelu ka mamba, lu asui, lu ehumba, lu akambu wa penyo, 5lu dikomoki, lu mvudu ya kanu,6:5 Etsh. 16:23. lu mindju, lu pa, lu senelo, lu dikilelu dia mbu ya nde; 6lu pudipudi, lu ewu, lu ndjakimela kʼedja, lu ketshi, lu Nyuma kʼOlolo, lu ngandji kaha la lukesu; 7lu diui dia mete, lu wulu a Unyashungu, lu eloto wa ta wʼakambu wʼololo, lu lunya la pami ndu lu lunya la lomoso; 8la lutumbu ndu la dionyo, la lukumu la kolo ndu la lukumu lʼololo; uku akanga wa kashi, keli teko la aui wa mete; 9uku wane waheyama, ku tambeyama ololo; uku wane wayanga mvo, ku eko la lumu; uku wane wasuyama, keli tatadiakema; 10uku akanga wa lunyangu, keli shu tatongenangenaka nshi tshe; uku akanga a weula, keli shu tatongonyaka antu efula; uku wane waha la engo, keli shu teko akanga wa diango tshe.

11Asi Koreto li! enyo asu wambudiho uya le nyu, etema asu wambuyala hwe. 12Nyu kema pika lu etemʼasu, keli nyu nyame mbeli pika lu ngandji kanyu. 13Ne dia nemanya la nyu — lambunyutela uku anʼami — nyudihuli ndu nyu etema anyu hwe.

 

14Tanyosohanaki kame la wane wahetawo. Ne dia ololo la kolo weko la esohanelu kakona? anyi la udjima ukundi ewo pupu? 15Kristu eko la Beliyala ekesanelu kakona? Umbetawudi la untu lahetawo weko la etenyi kakona kame? 16Etemwelo ka Unyashungu la ka dikishi weko la esohanelu kakona ne dia shu teko etemwelo ka Unyashungu a lumu;6:16 1 Kor. 3:16; 6:19. uku akati Unyashungu ati: Dimi layuyala lu etema awo, Layokendakenda lu etema awo. Dimi layuyala Unyashungu awo, Ndu vo wayuyala antu ami.6:16 Lew. 26:12; Ezek. 37:27. 17Okone nyumo uma lʼatei awo, Nyuyatuli uma le wo, mbata Khumadiondjo, Tanyunandaki engo ka kolo; Ku dimi layunyulungula,6:17 Is. 52:11. 18Layuyala uku Shenyu, Nyu nyayuyala anʼami wʼapami la anʼami wʼamantu,6:18 2 Sam. 7:14; 1 Ek. 17:13; Is. 43:6; Jer. 31:9. Mbata Khumadiondjo Kanga-Wulu-Tshe.

2 KORETO 7

1Okone, anyasu wa ngandji, ne dia shu teko la alaka ane, tuyalongosole uma lu mindu tshe ya dimba ndu yʼetema, tuluwanya akambu wʼekila la woma a Unyashungu.

 

2Nyutudihweli etema anyu. Shu kuntshela nduku untu kolo, shu kunanya nduku untu, shu kunkesa nduku untu. 3Dimi halati osoku dia nyamia, ne dia dimi lakati ntundu nti: Nyu nyeko lu etema asu, dia mvo kame ndu ndjala la lumu kame. 4Dimi leko la elungamelu ka wulu le nyu! Dimi leko la ufunu a wulu lu dikambu dianyu! Dimi lambuludiama lʼekikitshelu; lambulula lʼongenongeno otekoya lu asui asu tshe.

5Ndu lamʼakatakumi la Makedoniya,7:5 2 Kor. 2:13. alimba asu tawaki la mumuya, keli takasuyama lu beke tshe — ata waki lʼandja, weoma waki lu etema. 6Keli Unyashungu latukikitshaka akanga a ndjakitshakitsha, ndi akatukikitsha lamʼakayi Tito. 7Aha ne dia eyelu kandi ketu, keli takakikitshama ndu uma lʼekikitshelu kakanyukikitshe lamʼakandatutela ekumbwelu kanyu, la delu dianyu, la saki kanyu dia dikambu diami. Osoku dimi lakaleki ngenangena. 8Kuyanga mukanda ami akanyunyangia, dimi hayatshumuya dikambu diku: lakayatshumuya ntundu (ne dia lakenyi nti: Mukanda uku akanyunyangia nshi motshi tshu), 9ku kakiane dimi lambongenangena, aha ne dia dimi lakanyunyangia, keli ne dia nyu nyakanyangi, edja ndu ekadimwelu kʼetema; ne dia nyu nyakayangiama uku lulangu la Unyashungu, diaha nyu nshisha engo dia dikambu diasu. 10Ne dia lunyangu uku lulangu la Unyashungu atutungaka ekadimwelu kʼutema utsha lu panda. Untu hayatshumuya ne dia ekadimwelu keku, keli lunyangu la wa la kete atutungaka nyoi. 11Nyendi, ne dia nyu nyakanyangiama uku lulangu la Unyashungu, dikambu diako mbambutunga elamelu ka wulu lʼetema anyu, ndu nyindjama, ndu kele, ndu woma, ndu ekumbwelu, ndu saki, ndu esombweyo! Nyu nyakayayindja lu akambu ane tshe. 12Osoku mbakamanyufundela mukanda, aha ne dia one lakatshi dikambu dia kolo, aha ne dia one lakandatshela kolo, keli ne dia elamelu kanyu le su kenami lu ashu a Unyashungu. 13Okone shu takakikitshama.

Lu ekikitshelu kasu, mbakatatamanya ngenangena ne dia ongenongeno a Tito, ne dia nyu tshe mbakasalanganya utema andi. 14Ne dia dimi kumbutshama sonyi lamʼakamanyutumbula le ndi. Keli uku akatanyutela akambu tshe mete, okone ndu aui ami wa nyutumbula wakamati la ntundu ka Tito, wakenama ati: Mete. 15Ngandji kandi kambuleka efula le nyu lamʼuhondi ukitanyia anyu tshe, okone akanyulunguia la woma la lukumba. 16Dimi lambongenangena ne dia elungamelu keli la mi dia dikambu dianyu.

2 KORETO 8

1Dikambu dikina, anyasu, shu nangaka nyu mbeya dia ngandji ka mamba ka Unyashungu, kakandasha ekelizia wa la Makedoniya. 2Okone lu ehimbelu kʼasui, ongenongeno awo efula la wula awo wakatamanya mbudia lukahu lawo. 3Dimi lambunyutela uku omenyi nti: Uku wulu awo, ndu ndeka wulu awo, vame wakakimo diango; 4wakatosengasenga otekoya dia ngandji ka mamba kene la dia ekesanelu kasu, dia nkambela ekilami8:4 Rom. 15:26. — 5Vo wakaleki elungamelu kasu; ntundu wakayakimo le Khumadiondjo, ndu le su, uma lu lulangu la Unyashungu. 6Dia dikambu ne, mbakatakokomiya Tito, uku akandatatela ulimu one ntundu, dia ndi nyanga nkukia ngandji ka mamba kene ndu le nyu. 7Uku akanyakuki lu akambu tshe lu mbetawo, ndu lu wutelu, ndu lʼewu, ndu lʼukalanganu tshe, ndu lu ngandji kanyu le su, okone nyuyangi nkukanya ndu ngandji ka mamba kene.

8Dimi hanyutela diui ne uku olembe, keli dia mbeya mete ka ngandji kanyu la ukalanganu wʼakina. 9Ne dia nyu mbeyaka ngandji ka mamba ka Khumesu Jesu Kristu, nyati: Kuyanga ndi aki ongonyi, ndi akayala la wula dia dikambu dianyu, dia nyu najala engonyi uma lu wula andi 10Dimi lambunyutela tukanyi tami lu dikambu ne nti: Ndeka ololo, nyu wane wakatatela dikambu ne eleku ka lʼokongo, dia nyu dishidiya kakiane, aha dia ntsha tshu, keli ndu dia nanga ntsha. 11Keli kakiane nyumani ntsha, uku akanyalangi ntsha, okone nyuyali la wulu wa dishidiya. 12Naka lulangu leko, layetawoma uku yediko le untu, aha yediko yaha la ndi. 13Dimi halati diui ne dia akina nsalangana, la nyu ndjala la lunyangu. 14Keli ne dia mbedimia yediko pupu, diango dianyu efula lʼetena kene, diambukuka dia ehumba awo, ne dia diango diawo efula ntu diakuki lʼehumba anyu. Okone nyayedima pupu. 15Uku akafundama ati: One lakasanganya efula, taki la engo kakatshikala: lakasanganya tshitshe, kumpumba.8:15 Etum. 16:18.

 

16Keli tambuka Unyashungu lusaka, ne dia ndi ambudja tukanyi ta nyulama ololo lʼutema a Tito. 17Aha paka ne dia ndi aketawo daku diasu, keli ndu ndame aki la ukalanganu efula, akatshu le nyu dia lulangu landi. 18Ku shu takatumi unyasu kame la ndi, leli la diandu lu lukumu lʼololo lʼekelizia tshe. 19Aha dikambu so tu, keli ndi akasonama ndu uma le ekelizia, dia nkindula la su la ngandji ka mamba kene, kakambelasu lu lutumbu la Khumadiondjo, la dia menya antu ukalanganu asu. 20Shu tambetawo dikambu ne, dia untu atukutosongwela ne dia ushasha one wakambelasu. 21Ne dia shu tatukanaka yimba yʼakambu wa kenemo, aha lu ashu wa Khumadiondjo utu, keli ndu lu ashu wʼantu.8:21 Tuk. 3:4. 22Shu takatumi unyasu kame la wo, takedika ukalanganu andi tena kambi lu akambu efula, keli ukalanganu ako ambutamanya kakiane, ne dia elungamelu ka wuki keli la ndi le nyu. 23Naka untu ambunyumbula dikambu dia Tito: ndi eko umbekesanedi ami la unyami ukambi lu dikambu dianyu; ndu dia anyasu, vo weko akendji wa ekelizia, vo weli lutumbu la Kristu. 24Okone nyuwaenya djimbitelu ya ngandji kanyu la ntundu ka ekelizia, ndu ndjatumbula kasu lu dikambu dianyu.


 

2 KORETO 9

1Dimi kema la dikambu dia nyufundela dia nkambela ekilami. 2Ne dia dimi mbeyaka ukalanganu anyu, wakamanyutumbula le asi Makedoniya nti: Asi Akaya wambuyalongosolaka eleku kʼutundu. Ukalanganu anyu ambosemanela la amotshi efula. 3Keli dimi lambutuma anyasu, dia ndjatumbula kasu lu dikambu dianyu tayalaki uyalayala. Uku akamati, dimi nangaka nyu nongoswama. 4Naka antu amotshi wayuya kame la mi uma la Makedoniya, wayunyutana nyatayalongosola, ku shu — hatulangi mvuta shati: Nyu — tayutshama sonyi lu elungamelu kene. 5Okone dimi lakakani nti: Ololo nsengasenga anyasu, vo watateli la ntundu utsha le nyu. Vo watasanganyisha eshasha wakanyalaki ntundu, ne dia diango diku diayali uku ushasha, aha la khudu.

6Dimi lambunyutela dikambu ne nti: Untu lune diango tshitshe, ayuna diango tshitshe; untu lune diango efula, ayuna diango efula. 7Untu lʼuntu akimo uku akandati lʼutema andi, aha la lunyangu, aha la khudu, ne dia Unyashungu nangaka untu latukimoka lʼongenongeno. 8Unyashungu mbeyaka nyufudiya ngandji ka mamba tshe, ne dia nyu nyatuyalaka la diango kambi nshi tshe, ku nyuyafudiya lu elimu wʼololo tshe. 9Uku akafundama ati: One lakadianganyaka diango, Ndi akashaka akanga a weula eshasha; Ololo andi atutshikalaka pundju.9:9 Esam. 112:9.

10One latushaka umbuki wuhu la ma dia nde,9:10 Is. 55:10. ndi ayunyusha wuhu anyu wa mune, ayuwufudia, ayuhamia elua wʼakambu anyu wʼololo. 11Nyu nyambongonyama lu akambu tshe, ne dia lukahu lone la mamba! Lukahu lako layukundjiya Unyashungu lusaka uma le su. 12Ne dia ekambelu kʼulimu one aha paka dia nkutsha yediko yʼehumba wʼekilami tshu, keli ambufudia ndu lusaka efula le Unyashungu. 13Lu ehimbelu kʼulimu one, vo wayutumbula Unyashungu, ne dia ukitanyia anyu wa mbetawo ka lu lukumu lʼololo la Kristu, la dia lukahu lanyu le wo ndu le antu tshe. 14Ndu vame watunyolombelaka Unyashungu, wambunyukumbula wulu, ne dia ngandji ka mamba kʼutamanya ka Unyashungu keli lʼetema anyu. 15Lusaka le Unyashungu, ne dia ushasha andi waheyana mvuta.

2 KORETO 10

1Dimi Paulu lambunyosengasenga dia memakana la kenemo ka Kristu — dimʼako lukitshikitshi la ntundu kanyu lamʼemi la nyu, keli amakina dimi ndjalaka la di anga lu dikambu dianyu! — 2Ee, lambunyosengasenga nti: Dimi hanyenya dihunga lu elungamelu keli la mi le akina, watutalaka uku ntu watokendakendaka lu akambu wa dimba. 3Kuyanga shu tatokendakendaka lakambu wa dimba, shu hatolo ta uku dia dimba, 4ne dia dihumo diasu dia ta diaha dia dimba, keli dio dieko la wulu wa Unyashungu wa mpandjula wembe wa ta. 5Shu tatuhandjulaka tukanyi, ndu engo ka ladiku tshe katosemanelaka la ewu ka Unyashungu, tatolembiaka tukanyi tshe, dia to ndjala la ukitanyia le Kristu. 6Shu tayuyalongosola dia nsomboya uhedia tshe lamʼayukuka ukitanyia anyu.

 

7Nyu nyatendaka akambu wenanyu. Naka untu ambuyaekama ati: Usika Kristu kemi, ndi amuyaenda uku endi usika Kristu, ndu shu pupu. 8Kuyanga dimi lambuyatumbula kambi ne dia wulu asu, wakatusha Khumadiondjo ne dia nyudia, aha dia nyuhandjula, dimi halutshama sonyi. 9Dimi ntenamaki uku untu layanga nyutsha woma lu mikanda ami. 10Ne dia vo mvutaka vati: Mikanda andi weko wutshu la wulu, keli eyelu kandi lʼutundu, eko wodu; la diui diandi dieko anyanya. 11Untu uku eyi dikambu ne ati: Uku wesu lu aui wa mikanda lamʼahasu laawo, osoku mbayutuyala ndu lu etsha asu lamʼesu laawo, 12ne dia shu kema la dihunga dia ndjadia kana ndjaedimia la antu akina watuyandulaka. Keli vame watuyaedikelaka, watuyaedimiaka, vo kema la yimba.

13Keli shu hatulangi ndjatumbula uleki yediko, tayuyatumbula uku yediko yʼulelu yakatusha Unyashungu uku yediko yasu, yambukuma le nyu. 14Shu hatutambi ulelu, kuyanga mbakisu kunkuma le nyu, ne dia shu takakumi le nyu, ntundu la lukumu lʼololo la Kristu. 15Shu hatulekana ulelu asu, dia ndjatumbula lʼulimu wʼantu akina. Keli tambulungamela shati: Lamʼayula mbetawo kanyu, shu tayutumbwama lʼatei anyu lʼulelu asu, dia shu ntsha ulimu wuleki wuki, 16ne dia nsambisha wa lu beke dikina dieli la wedi anyu lukumu lʼololo, hatuyatumbula lu leke lʼuntu ukina lu akambu wakandatshi. 17Keli one latuyatumbulaka, ayatumbuli le Khumadiondjo.10:17 Jer. 9:24. 18Ne dia aha untu latuyandulaka, kambetawoma, paka one landula Khumadiondjo.

2 KORETO 11

1Dimi lutulanga nyu ndjala la mi lu yema ya nginyanginya! Keli nyu nyambuyala la mi wuhu ako! 2Ne dia dimi lambunyuka kandjema, kandjema ka Unyashungu. Ne dia dimi lakanyutshukamia le umi otoi, dia nyukimo uku usekaseka wʼemuma le Kristu. 3Keli dimi lambuka woma nti: Uku akadimbiya ului Eva la lukesu landi,11:3 Etat. 3:1-5, 13. tukanyi tanyu tatukulana uma lʼuluwanyi a mete la pudipudi utsha le Kristu. 4Lamʼayuya untu la ndjunyusambisha dia Jesu kina, yakisu kunyusambisha, kana naka nyambulungula nyuma kekina, kakinyu kunungula ntundu, kana lukumu lʼololo lakinyu kumbetawo, nyu nyambuwetawo ololo. 5Ne dia dimi nkanaka nti: Dimi kema lʼokongo wʼatumami wuleki waki nduku yema. 6Kuyanga dimi haleyi nteketa, keli laha osoku lu ewu. Shu takanyenya dikambu so lu akambu tshe.

7Undi, dimi lakatshi kolo lamʼakama-yakitshakitsha dia nyu mbediama, ne dia lakanyusambisha lukumu lʼololo la Unyashungu usambishasambisha? 8Dimi lakavi diango diʼekelizia ekina, lakalungula afutu uma le wo dia nyukambela ulimu. 9Lamʼakimi la nyu, lamʼakamahumbi, dimi taki la wutshu le untu. Ne dia lamʼakayi anyasu uma la Makedoniya, vo wakakutsha yediko yʼuhumba ami.11:9 Fil. 4:15-18. Dimi lakayashikike nti: Dimi latukuyala wutshu le nyu lu akambu tshe, ku dimi layuyashikike wuhu ako ntu. 10Uku mete ka Kristu keli le mi, nduku untu ayonembohaya uma lu ndjatumbula kene lu beke diʼAkaya. 11Dikambu diakona? Ne dia hanyulangi? Unyashungu mbeyaka!

 

12Keli akambu watumutshaka, layuwatshaka, ne dia minya dikambu dia ndjatumbula uma le wane walanga dikambu dia ndjatumbula. Ne dia lu akambu wa ndjatumbula, vo wayali uku shu. 13Ne dia antu aku weli atumami wa kashi, ekambi wa lukesu, wambuyakadimula uku atumami wa Kristu. 14Oso kema dikambu dia mamba, ne dia ndu Satana katukadimoka uku ondjelo a yanyi. 15Okone kema dikambu dia wuki dia ndu ekambi andi nkadimo uku ekambi wʼakambu wʼololo. Ekumelu kawo kayuyala uku etsha awo.

 

16Dimi lambuta ntu nti: Untu tamenaki, dimi Paulu, enginya. Keli naka nyu nyambutsha, nyambunungula uku enginya, dieli la mi dia ndjatumbula yema. 17Akambu watumutaka, halawati uku aui wa Khumadiondjo, keli uku la nginyanginya, lu dikambu ne dia ndjatumbula. 18Ne dia antu efula watuyatumbulaka lu akambu wa dimba, ndu dimi layuyatumbula. 19Ne dia nyu, akanga a yimba, nyatukikelaka dinginya lʼongenongeno. 20Nyu nyatukikelaka untu lamʼanyudjandi lu fumbi, lamʼalendi diango dianyu, lamʼanyudjandi, lamʼayambiyandi, lamʼanyokomolandi lu dundji. 21Dimi lambuta la sonyi, dia mvuta nti: Shu taki weodu.

Keli naka untu la dihunga lu dikambu dimotshi — lambuta la nginyanginya — keti ndu dimi keli la dihunga. 22Asi Heberu mbewo? Ndu dimi pupu. Asi Isariyele mbewo? ndu dimi pupu. Tukanula tʼAbarahama mbewo? Ndu dimi pupu. 23Ekambi wa Kristu mbewo? — lambuta uku kanga tshupi — dimi lambaleka lu elimu wuleki efula, lu mvudu ya kanu11:23 Etsh. 16:23. yuleki efula, lu dikomoki diaheyama mbala, lasuki la nyoi tena efula. 24Asi Juda wakankomola tena tanu, dia eshingo akumi anei akumi anei; tshikima etena otoi, kaki kundjala akumi anei.11:24 Euh. 25:3. 25Dimi lakakomwama ehamba11:25 Etsh. 16:22. tena satu; wakambuki ave11:25 Etsh. 14:19. etena otoi; lakasuwi tena satu lamʼakaditi watu; laki lʼungunda wʼashi utshu otoi la yanyi otoi. 26Lu kendo tena efula, lu akambu wa wulu lu ekedi, lu akambu wa wulu le apotodi, lu akambu wa wulu le any ami,11:26 Etsh. 9:23. lu akambu wa wulu le asi wedja,11:26 Etsh. 14:5. lu akambu wa wulu lu esumba, lu akambu wa wulu lu esui, lu akambu wa wulu lu ashi a waki, lu akambu wa wulu lʼatei anyasu akanga a kashi. 27Lu asui la akambu wa pa, lu esenaki tena efula, la ndjala la pusa, lu dikilelu dia mbu ya nde tena efula, lu tshitshi la utakataka. 28Ladiku dia akambu aso wa dimba, dimi la dikambu dieli wutshu le mi la lushi la lushi, ne dia nkanela ekelizia tshe. 29Akona eli wodu, ku dimi hayala la ndi wodu? Akona ambutakanyema, ku dimi halutshama sonyi?

30Naka dieli la mi dia ndjatumbula, layuyatumbula lu dikambu dia wodu ami. 31Unyashungu, Shi Khumadiondjo Jesu, one latutumbwamaka, mbeyaka ati: Dimi halati kashi. 32La Damaseke, umbuledi wa la tshina dia khumʼekanga Areta akalamaka usumba wa Damaseke ne dia mundami. 33Keli wakampuluya uma lu didishi lu saka, lu eheli ka lukumbu; lakahandi uma lʼanya andi.

2 KORETO 12

1Hasungana dia dimi ndjatumbula, keli dieli la mi dia ndjatumbula dia waenelo la waenyelo uma le Khumadiondjo. 2Dimi mbeyaka untu omotshi le Kristu lakosama edja ndu lʼulungu a satu, aya uku deku dikumi la nei — kana ndi aki la dimba, haleyi; kana taki la dimba, haleyi; Unyashungu keya. 3Dimi mbeyaka untu ako lakosama utsha lu Paradisu — kana la dimba, kana aha la dimba, haleyi; Unyashungu keya — 4ku lakuki akambu wahameyi mvuta, wahakuki untu mvuta. 5Dimi layuyatumbula lu dikambu dia untu oso. Keli dimi hayatumbula dikambu diami, tshikima dia weodu ami. 6Utumulanga ndjatumbula, tshiki dimi hayala kanga enginya, ne dia layuta akambu wa mete. Keli halatshi osoku, untu talekaki ntumbulami ladiku dia akambu wenandi, kana wukandi, le mi. 7Ne dia waenyelo a waki utamanya le mi, la dia dimi ntukuleka ndjatumbula, ku wakambisha engo uku tende lu dimba diami, dikendji dia Satana, ne dia mpenyahenyami, dia dimi ntukuleka ndjambiya. 8Dimi lakalombe Khumadiondjo tena satu dia minyiami engo kene. 9Ndi akamvutela ati: Ngandji kami ka mamba nkukaka le ye: ne dia wulu ami atukukiamaka lu wodu. Okone dimi layuyatumbula lu wodu ami la ongenongeno efula, ne dia wulu a Kristu ankhukhume. 10Okone dimi latongenangenaka lu wodu, lu tengo, lu ehumba, lu asui, lu lokonyo, dia dikambu dia Kristu; ne dia lamʼemi wodu kemi la wulu.

 

11Dimi lambuyala enginya! Nyu nyakambete osoku, ne dia diaki la nyu dia mbeyanyami. Dimi taki lʼokongo wʼatumami wuleki waki, kuyanga mbemi anyanya. 12Mete, tulimbitelu tʼutumami takatshama lʼatei anyu lʼeteti, ndu tulimbetelu ndu akambu wa mamba, ndu akambu wa wulu. 13Lu akambu akona wakanyaleki ekelizia ekina tshitshe, tshikima lu dikambu ne, dia dimi kundjala wutshu le nyu? Nyunyimanyia munga keso.

14Nyulungi, one eli etena kamumuyalongosola, kayangami ndja le nyu. Dimi hayala wutshu le nyu, ne dia dimi hayangi diango dianyu, lambunyuyanga nyame. Ne dia ana hawutumbelaka ambutshi diango, keli ambutshi mbatumbelaka ana diango. 15Dimi layuyala la ongenongeno otekoya dia nkimo diango, ndu ndjakimo, ne dia nyumu yanyu. Naka dimi lambuleka nyulanga, ku nyu hanyunangi yema? 16Dikambu so diayali osoku, dimi kundjala wutshu le nyu; ne dia lakewo, lakanyose la yewu. 17Dimi lakanyukesi uma le untu lakamanyutumela uka? 18Dimi lakakokomiya Tito, lakatumi unyasu la ndi. Tito akanyukesi uka? Shu konkendakenda la Nyima pupu? Shu konkendakenda lu wanya ako?

 

19Nyu nyambukana tena tshe nyati: Shu tambuyanga ndjayindja lu ashu anyu? La ntundu ka Unyashungu kateketas le Kristu. Elangimi ami, akambu ane tshe weko dikambu dia nyudia 20Ne dia dimi lambuka woma nti: Lamʼayumukuma le nyu, dimi halunyutana wuhu wayumulanga undu, la nyu hanyuntana wuhu wayunyulanga. Dimi lambuka woma nti: Layutana tamu, kandjema, kele, mbatana, nsudukana, ntendana, enginu, la mindju. 21Ntu, lambuka woma nti: Lamʼayumukuma le nyu, Unyashungu ami ayunkitshakitsha la ntundu kanyu. Ku dimi layulela ne dia antu efula wakatshi kolo ntundu, watakadimula etema uma lu akambu wa mindu la munanyi, la saki yʼakambu wa kolo wakawatshaka.

2 KORETO 13

1Etena ka satu kene kayamayi uya le nyu. Diui tshe diayushikikala lʼenyo wʼemenyi ehendi kana esatu.13:1 Euh. 17:6; 19:15. 2Dimi lakanyutela ntundu, ndu lambunyutela kakiane, uku lamʼakimi laawo lʼetena ka hendi, kakiane lamʼahami laawo, lambutela wane wakatshi kolo la ntundu, ndu akina tshe, nti: Naka dimi layuya ntu, haluwauka ketshi. 3Ne dia nyu nyambuyanga djimbitelu ya dikambu dia Kristu, one lateketa lʼutema ami; one laha wodu le nyu, keli ndi eko la wulu lʼetema anyu. 4Ne dia ndi akadiakema lu utamba a mpeketanya lu wodu, keli ndi eko la lumu uma lu wulu a Unyashungu. Shiu teko la ndi weodu, keli shu tayuyala la lumu kame la ndi uma lu wulu a Unyashungu le nyu.

5Nyuyaunganeli nyame, kana nyu la mbetawo; nyuyaediki nyame. Nyame hanyeyi nyati: Jesu Kristu eko lʼetema anyu? Naka kema, keti anyanya mbenyu. 6Keli dimi lambulungamela nti: Nyu nyayeya nyati Shu kema anyanya. 7Shu tambolomba Unyashungu shati: Nyu tanyutshaki dikambu dia kolo. Aha ne dia shu ndjala uku wane wetawonyu, keli dia nyu ntsha akambu wʼamena, kuyanga shu tayuyala uku antu wʼanyanya. 8Ne dia shu kema la wulu a ntsha dikambu diutshikitanyi la akambu wa mete, paka dia mbudia akambu wa mete. 9Shu tambongenangena lamʼesu la wodu, la lamʼenyu la wulu. Shu tambunyolombela ndu dikambu so, dia nyu ndjala ololo tshe. 10Dia dikambu so mbafundami akambu ane lamʼahami laawo, ne dia dimi ntukuyala la dikambu dia nyutshela la ngala lamʼayumuyala la nyu, uku wulu wakambisha Khumadiondjo dia nyudia, aha dia nyuhandjula.

 

11Lu ndjihelu, anyasu, moyo. Nyuyali ololo tshe; nyukikitshami; nyuyali la kanyi otoi; nyudjase ki. Ku Unyashungu a ngandji la ki ayuyala la nyu. 12Nyushani moyo la ononanelu wʼekila. 13Ekilami tshe wambunyutela moyo.

 

14Ngandji ka mamba ka Khumadiondjo Jesu Kristu, la ngandji ka Unyashungu, la ekesanelu ka Nyuma kʼOlolo, wayali la nyu tshe!