2 PETERO

Chapitres

 1. 2  -   2. 3  -   3. 4

2 PETERO 1

1Simona Petero, ukambi la utumami a Jesu Kristu.

Le antu wakalungula mbetawo kʼololo pupu uku keli la su lu ololo a Unyashungu asu Ushimbedi Jesu Kristu:

2Ngandji ka mamba la ki waludiami le nyu lu nimbitela Unyashungu le Jesu Khumesu!

 

3Wulu wa Unyashungu ambutusha diango tshe dieli kame la lumu la ololo andi, ne dia shu tambulimbitela one lakateti dia lutumbu landi la ololo andi. 4Lu akambu ane, mbakandatusha alaka wa ushinga a wulu la wa waki otekoya. Lu dikambu diawo, mbayuwunyete elungudi wʼakambu wʼololo weli lʼutema a Unyashungu. Nyu nyakahandi uma lʼehondelo keli le wa la kete uma lu saki ya kolo. 5Dia dikambu ne, nyutetemali dia nsanganya ololo wʼutema lu mbetawo kanyu; lu ololo wʼutema nyusanganya yimba; 6lu yimba, nyusanganya ndjakimela; lu ndjakimela, nyusanganya ndu etetemalu; lu etetemalu, nyusanganya ndu ololo a Unyashungu; 7lu ololo a Unyashungu, nyusanganya ketshi le anyanyu; lu ketshi le anyanyu, nyusanganya ngandji. 8Naka akambu ane wambuhama lu etema anyu, vo hawunyete tusuasua kana uku antu wahato elua dia nimbitela Khumesu Jesu Kristu. 9Naka untu laha la akambu aso, keti kanga tshungu kendi, latenaka diango dieli lasuki tu. Ndi ambuhela ati: Dimi lakediama uma lu akambu ami wa kolo wʼedjedja. 10Okone anyasu, nyutetemali dia nshikimala lu leta lanyu la lu osonamelu anyu. Naka nyu nyayutsha akambu aso, ku hanyutakana pundju. 11Okone wayunyusha eotwelo ka lu diulelu dia pundju dia Khumesu, Ushimbedi Jesu Kristu.

 

12Okone dimi layuhoka dia nyuhula akambu ane nshi tshe, kuyanga nyu mbaeyaka, ndu nyambushikikala lu akambu wa mete weli la nyu. 13Dimi lambukana nti: Dikambu ne dieko ololo lamʼekimi lu dimba ne, dia dimi ntshutshiya etema anyu, dia nyuhula; 14nedia dimi mbeyaka nti: Etena ka dimi mumo lu dimba diami kayukuka esadi, uku akamenya Khumesu Jesu Kristu. 15Okone dimi layutetemala lu akambu ane, ne dia nyu mbeyaka mbauho tena tshe lamʼayumuvo.

16Ne dia shu kundjela ekondo wʼuma lu yimba yʼantu, lamʼakatanyutela dia wulu la dia eyelu ka Khumesu Jesu Kristu, keli shu taki emenyi wa lutumbu landi lu ashu. 17Ne dia ndi akalungula kenemo la lutumbu uma le Unyashungu, Shesu, lamʼakayi diui ne le ndi uma le Lutumbu la Khumadiondjo ati: Onʼami la ngandji one, ndi atongenyangenyaka. 18Shu takuki diui so diakayi uma lʼulungu, lamʼakisu kame la ndi lʼukungu wʼekila.1:18 Mat. 17:1-5; Mak. 9:2-7; Luk. 9:28-35. 19Shu teko la diui ne diʼamvutshi, diuleki nshikimala. Okone nyu nyayutsha ololo lamʼayunyewo, uku ewonyu tala diaheta lu dihuli dia udjima edja ndu lamʼayuhuto unya, ndu lamʼayuhanema yoto ya loheto lʼetema anyu. 20Nyuteyi dikambu ne nyati: Diui diʼefundelu hadiukadimwama le untu lʼuntu. 21Ne dia nduku diui diʼamvutshi diakayi uma lu lulangu la antu, keli antu wakati diui uma le Unyashungu, wakasukuyama uma le Nyuma kʼOlolo.

2 PETERO 2

(Jud. 4-13)

1Keli amvutshi wa kashi wakatumbi lʼatei wʼantu, uku embetsha wa kashi wukuyala lʼatei anyu, wayuya la akambu wa tamu wʼelanyelu lu usheshe. Vo wayanguna ndu Khumadiondjo lakatshungula, wayulanyema esadi. 2Antu efula wayuyela akambu awo a mindu. Dia dikambu diawo, mbayuwonyola mbuka kʼakambu wa mete. 3Ne dia okomiya mbayuwengonya la nyu ushinga la aui wa nyimbiya. Dianyelu diawo diakawanyema edjedja, hatshimbatshimba; elanyelu kawo hetama djo.

 

4Naka Unyashungu kunshimbela andjelo lamʼakawatshi kolo, keli akawakadja lu luwinga la dja, akawadji lu afuku wa udjima, dia vo ndjala loko edja ndu elumbwelu; 5naka ndi kunshimbela antu wa ntundu, keli akashimbela Noa, umvutshi wʼakambu wʼololo, la antu akina esambeli, lamʼakandatumi elula ka wuki le antu wa kolo waki la kete;2:5 Etat. 6:1—7:24. 6naka ndi akahiluya esumba wa Sodoma la Ngomora, wakayala eduwu,2:6 Etat. 19:24. akawamia la dihandjwelu, akawete uku djimbitelu le antu wayutshaka akambu wa kolo, 7ku akahandja Lota, untu ololo, lamʼakandahenyahenyama la akambu wa mindu wakatshaka antu wa kolo2:7 Etat. 19:1—16. 8(ne dia untu ololo uku lakadjaseka lʼatei awo, lamʼakandenyi ndu lamʼakanduki akambu wa kolo awo, akambu ako wakanyangiaka utema andi wʼololo la lushi la lushi). 9Ku Khumadiondjo mbeyaka wuhu wa nshimbela antu wʼololo uma lʼehimba, la mbete antu wa kolo lu asui edja ndu lushi lʼelumbwelu. 10Keli ndi ambuleka ntshela antu watokendakendaka lu saki yʼakambu wa kolo wa dimba, la watonyolaka waulelu osoku.

Vo weko la etema wa wulu, weko la lunyu, hawudidima lamʼatengawo akambu wa lutumbu. 11Keli andjelo mbaleka waki la wulu, hawasongwela la diui dia lotengo la ntundu ka Khumadiondjo. 12Keli vo weko uku nyama yaha la yimba, yakuto dia ndjinda la ndjidiaka, watotengaka antu lu tkambu wahaweyi. Vo wayulanyema lu elanyelu kawo mete mete, 13wayusuwa uku difutu diʼakambu wa kolo awo. Antu ako watalaka engenongeno awo, dia vo ntsha akambu awo wa kolo lu yanyi, weli uku awadi la fu. Vo watolaka la kesu yawo lamʼalewo la nyu alambu. 14Ashu awo wambulula too la munanyi. Vo haweyi nkimo kolo, watuhimbaka akanga wʼetema a weodu. Etema awo wambekela nkomiya diango; vo weko uku ana wʼakanga a mananu. 15Vo wakaseke mbuka kʼololo, wakanganela, wakâyeli mbuka ka Balama, onʼa Beore, lakalangi difutu diʼakambu wa kolo, 16keli ndi akatshumwama dia uhedia andi. Punda ka lumi akateketa diui uku untu, akashimbi umvutshi wʼenginya.2:16 Wal. 22:4-35.

 

17Vo weko uku teko diambuma, weko uku wangi wasukuyama la ngimbi, wambakitshiya udjima a tshududu, 18Ne dia uma lʼaui wʼutaku watuwutaka wutata, ndu uma lu saki ya dimba la yʼakambu wa mindu, mbatuwuhimbaka wane wayanga mpanda uma le waku watokendakendaka lu akambu wa kolo. 19Vo watalakaka etshungwelu, keli vame weko fumbi ya akambu wa kolo wʼelanyelu; ne dia naka untu ambolembiama le engo kemotshi, ndi ndjalaka fumbi kʼengo kako. 20Naka vo wambuhanda akambu wa kolo wa la kete ne dia vo wakalimbitela Khumadiondjo, Ushimbedi Jesu Kristu, la naka vo wayudingitana, ndu wayolembiama ntu lu akambu ako, ku ekumelu kawo kayuleka etatelu kawo kolo. 21Utuleka ololo, utunduyala vo kumbeya mbuka kʼakambu wʼololo, la lamʼakawakieyi, dia vo mumo uma lʼelembe wʼekila wakawalungula. 22Dio diambuyala uku wela a mete le wo ati: Fo ambukalula lu tuwoki yato,2:22 Tuk. 26:11. sumbu ambushila mboka, ambuyakitula lu loteke ntu.

2 PETERO 3

1Elangimi ami, mukanda a hendi one wamumunyufundela kakiane. La lu ehendi kawo, dimi lambangasanya etema anyu wʼololo ne dia nyuhula. 2Dieli la nyu dia mbuho aui wakati amvutshi wʼekila, ndu elembe wa Khumadiondjo la Ushimbedi, wakandanyutela lʼenyo wʼatumami anyu. 3Nyuteyi ntundu nyati: Lu nshi yʼekumelu, asoki wayuya la losoko lawo, wayutshaka uku saki yawo;3:3 Jud. 18. 4wayuta vati: Daka dia eyelu kandi, lendʼedio? Ne dia umaka lushi lakavu watshesu, diango tshe dieko pupu uku akidio uma lʼetatelu kʼetungelu. 5Vo nyangaka mbuhela dia ulungu a ntundu, ndu kete yakatungama lʼashi, yeki lʼashi, uma lu diui dia Unyashungu.3:5 Etat. 1:6-9. 6Ne dia ashi ane, antu waki la kete wakakhukhumama lʼashi, wakashisho,3:6 Etat. 7:11. 7Keli ulungu weli kakiane, ndu kete, wambulamema la dja, uma lu diui diku diakandakitsha, edja ndu lushi lʼelumbwelu ndu lʼelanyelu ka antu wa kolo.

 

8Elangimi ami, dikambu otoi ne mbahumbanyu mbeya nyati: Lushi otoi leli uku deku kinunu3:8 Esam. 90:4. lu ashu wa Khumadiondjo, la deku kinunu dieko uku lushi otoi. 9Khumadiondjo huhela dia nshidiya alaka andi, uku atedikaka antu wauhu awo, keli ndi eko la nyu memakana. Ndi halangi nduku omotshi nshisho, keli ndi nangaka tshe wakadimuli etema. 10Keli lushi la Khumadiondjo layuya uku uvi.3:10 Mat. 24:43; Luk. 12:39; 1 Tes. 5:2; Eny. 16:15. Lu lushi lako, ulungu ayushisho la lundju la wulu. Diango diayolelo la dja ya wulu; ndu kete ndu diango tshe dieli loko, diayulungula.

 

11Ne dia diango ne tshe diayolelo, ku dieli la nyu dia ndjala wuhu akona wʼantu wayunyuyala lu akambu wʼololo tshe la wʼekila. 12Lamʼalungamelanyu lushi lʼeyelu ka Unyashungu, lu lushi lako layulungula ulungu dja; ndu diango tshe dieli loko, diayolelo la dja ya wulu! 13Keli ne dia daka diandi, mbalungamelasu ulungu wʼuyuyu la kete yʼuyuyu, lene udjashi akambu wʼololo.3:13 Is. 65:17; 66:22; Eny. 21:1.

 

14Okone, elangimi ami, ne dia nyu nyambulungamela akambu ane, nyutetemali dia nyu ntanema la ki, aha la vadi, aha la unungu lu ashu andi. 15Nyeyi nyati: Memakana ka Khumadiondjo keko panda kanyu, uku akanyufundela unyasu a ngandji Paulu, uku yimba yakandalungula, 16mbakandanyutela akambu ane uku atandi lu mikanda andi tshe. Akambu amotshi weli loko, weko wulu nshihudia. Akanga a dinginya la akanga a weodu watingisulaka akambu ako uku atshawo la afundelu akina, watuyalanyaka la wo. 17Keli yaka akambu ane ntundu, nyewo, nyutukunganela lu wetshelu wʼantu wa kolo, nyu nyatukoko lu eshikikalu kanyu. 18Keli nyuli lu ngandji ka mamba la lu elimbitelu ka Khumesu, Ushimbedi Jesu Kristu. Lutumbu layali le ndi kakiane ndu pundju! Ayali osoku!