Table des matières
Mu mikanda ya mu kalasa, malongesha onso manene adi malondibue ne diteta diadiunvua dimpe dia dilongesha. Mukanda wa Filemona kabidi udi utuelesha meshi mushindu eu. Kawena ne dibuluibua nansha dimue dia pa buadi. Kadi udi ulesha diteka dia mu tshienzedi kudi Paulo ne bena mudimu nandi ba misengelelu itudi tusangana mu mukanda eu. Wakafundila bena Kolosai ne : « Nunku bu munudi bantu basungula kudi Nzambi, ba tshijila ne bananga, luatai mutshima wa luse, ne dikuatshisha, ne wa kudipuekesha… » (Kolos. 3. 12… ; fuany. kabidi mv. 5 ne Efes. 1. 15).
Mu Kolosai menemene, ke muakadi Filemona musombe, muntu muimpe ne mulunda wa mupostolo, wakadi mubanshi, bualu bua wakadi ne bapika. Umue wabu Onesimo, kunyima kua mumane kunyema ku mpala kuende, wakasambakena ne mupostolo Paulo, wakadi mu nzubu wa lukanu mu Lomo ne wakakudimuna mutshima. Mpidieu, mupostolo udi umupigasha kudi mfumuende, mutuale mukanda wa dilongesha edi dinene. Kuenza mushindu eu, kuakadi kushipa tshiakadi tshiamba mukeshi : mupika wakanyema nunka kabakadi mua kumupingasha kudi mfumuende (bala Dutel. 23. 15, 16). Mikeshi, yakadi ibala mutshima mukole wa muntu (fuany. Mako 10. 5). Kadi ngasa kudi mupostolo udi ubala ngasa umue eu udi ukuata mudimu mu mutshima wa filemona. Paulo udi mumanye bimpe dinanga dia Filemona bua bansantu buonso (mv. 5) ne bileshelu biakadi dinanga edi dilesha (mv. 7).
Onesimo udi unvuisha ne « mukumbane ». Ku mpala wakadi mupika wa tshianana, katataka udi mukumbanyina dina diende (mv. 11). Kutamba abi, wakalua muan’abu wa lulamatu ne munangibue (mv. 16 ; Kol. 4. 9). Kakuena dina dikuabu didi ne mushinga anu dia muan’etu ne didi dikumbanyina mfumu udi muena kilisto, ne dikumbanyina kabidi mupika udi muena kilisto (mv. 7 ndekelu, 20). Ku luseke lua Paulo kena uteka dina dikuabu ku mpala anu dia muntu mununu ne dia muena lukanu (mv. 9). Bu yeye wakelenga meshi a bualu buandi nkayende, kakadi mua kupanga kukeba bua Onesimo ashale nandi amukuatshila mudimu nansha ! Kadi udi musue bua tshikondo tshikaleku : tshia yeye eu kufilaye bumanyishi mu nzubu wakenzaye bualu bubi ; bua Filemona, atangile mamuma a kukudimuna kua mutshima wandi, « amujadikile luse » (2 Kol. 2. 8).
Mu mushindu mukuabu, bualu bua Onesimo budi bufuanangane ne buetu. Bapika batomboke, tuakapetshibua mu njila wetu wa ditomboka, ne kupingashibua kudi Mfumu wetu. Ke bua tuetu kabidi kupingashibua mu ngikadilu wa bupika kabidi, kadi bu aba badiye ubikila ne bana babu bananga (fuany. mv. 16 ne Yone 15. 15). Ne Paulo apa udi tshimfuanyikishi tshia Mukelenge wetu Yesu Kilisto, udi ufuta dibanza dietu (mv. 17-19). Mukanda eu utamba kulongesha bua kubuesha mu muoyo wetu wa matuku onso, buena kilisto budi mu tshienzedi : kudipidia kuetu nkayetu, buimpe, kudipuekesha, ngasa… mu tshikoso, tshimuenenu tshivula tshia dinanga.