3 Yone 1-15

Mukanda muibidi wakadi ubenga bua kuakidila badi kabayi batuala « dilongesha dia Kilisto ». Mukanda eu muisatu udi usengelela bena kuitabusha bua kuakidila ne kukuatshisha badi babalongesha (fuany. Yone 13. 20). Kutabalela bena mudimu ba mukelenge, nkukuatshisha Lumu luimpe

(nv. 8).

Badi batulesha bantu ba bungi mu mukanda eu muipi. Gayo muine wakatuminaye mukanda, wakadi munanga wandi wakadi mutshima wende udiunda, wakadi wenda mu bushua, wakadi ne lulamatu, dinanga diende diakadi dimanyike kudi bantu buonso. Demetelio, udibo batela kule kuaka, wakadi biende ne bumanyishi buimpe (1 Tim.

3. 7). Kadi kutangila Diotelefe, wakadi musue bua kuikala kumutu kua bakuabu (1 Pet. 5. 3), wakula mei mabi bua mupostolo, kayi wakididila bana babu, ne wipata bakuabu mu ekelesia. Yone udi ufunda bua bana babu bakuabu batangadiki « bakalupuka bua dina » (mv. 7 ; tangila Bienz. 5. 41). Dina ditambe mena onso buimpe didi dia

Yesu ; diakadi dibakumbanyina bu lumu lua kutuadilabo bakuabu ne bu mukanda kudibu wa bumanyishi mu luendu luabu lua mudimu (Bienzedi 8. 35).

Mupostolo udi wamba ne : « kuidikishi bualu bubi, kadi bualu buimpe » (mv. 11 ; 1 Tesal. 5. 15). Bileshelu bia buimpe anyi bia bubi, tudi tubisangana mu mukanda eu. Tudi tuidikisha bileshelu kayi ? Diambedi tulonde Mukelenge Yesu, munda muende muakadi anu bualu buimpe (Mako 7. 37).